Punda—Geert Wilders, lider di e partido polítiko PVV ganadó di elekshon na Hulanda, no ta amigu di Kòrsou. Esei ta konosí atraves di su deklarashonnan personal i via ret sosial. Por lo general, Wilders no ta amigu di niun stranhero na Hulanda.

Si PVV, logra forma Gobièrnu, Kòrsou tin motibu di preokupá, anke Wilders den gobièrnu no por hasi muchu ku Kòrsou, debí na Estádos Unídos, kual pais ta mirando Kòrsou komo un aliado pa su ubikashon geográfiko dilanti kosta venezolano

Riba Twitter den pasado Wilders a yega di papia hopi malu di Kòrsou. Segun Wilders: “Kòrsou?. Awèl si,  duna nan vakashon dushi ku laman i solo ku playa, ya nan no tin nodi di bini mas. Mal idea. Wanta nan afó of ,anda tur pa Albania of pone nan un kaminda riba e plataforma pa bora riba laman. Pero hasié mas malu posibel pa nan”. Esei ta lokual Wilders ta pensa riba Kòrsou.

Pero no ta awor, sino for di 2012, Wilders ta boga pa saka Kòrsou for di Reino Hulandes. Pero no pa Kòrsou so, sino tur stranhero na Hulanda ta den peliger si Wilders gana. Wilders ta konosí di ta anti-islam, lokual tambe tin miónes di hulandes prekupá. Na 2012, Wilders a públikamente a bisa ku Kòrsou mester bira independiente mas lihé posibel. Tabata nèt despues Pueblo Soberano a gana elekshon. Huntu ku van Raak, Wilders a menshoná independensha di Kòrsou.

E promé deklarashonnan di Wilders na Hulanda ayera a bisa ku “awor si nan no por neglishá mi”. Esei a manda un mensahe bon kla pa tur polítiko den Reino Hulandes. Segun Wilders, “e hulandes ta importante i tur kos mester bai bek pa e hulandes”. Wilders a bisa di ta bai limitá entrada di stranheronan den e pais i limitá libertat riba asil.