Na febrüari 2022,  e kanal di notisia di Brazil Rio Janeiro a publiká potrèt  di e yu di Kòrsou ku a keda detené.

Willemstad—  Resientemente e mesun video di aña 2022 a bira viral unda por mira e siudadano lokal Shandel Rosa alias “Rasta Escalade” ku a keda detené na Brazil pa eksportashon di mas di 2 mil ton di kokaina. Ta trata di un notisia bieu ku a bolbe bini den publisidat.

Ata aki e artíkulo ku Vigilante a publiká 25 di febrüari 2022 tokante detenshon di  e siudadano lokal  Shandell Rosa alias “ Rasta Escalade”  pa violashon di e lei di droga na Brazil : Outoridatnan na Brazil  a logra di desmantelá un organisashon basta grandi ku tabata hasi uso di e haf na Rio Janeiro pa manda tonelada di droga pa Europa. Ta trata di un investigashon ku ya tin 1 aña i mei andando unda tabata sigui un grupo basta grandi ku tabata hasi uso di e haf pa asina por a eksportá kantidatnan grandi di droga bon skondí den kònteiner pa Europa.  E investigashon a kuminsá despues ku a usa infiltrante kontra di e empresario Cristiano Cordoba ku tabatin un negoshi di karga.   A kuminsá sospech’é di labamentu di plaka despues ku a tuma nota ku e tabata invertí suma nan grandi den kabai ku tabata yega mas di mei mion dòler pa un kabai.  For di e investigashon a bin saka afó ku e tabata doño di no  ménos 60 kabai di kareda ku tabata balorá na vários miónes di dòler. Via di e infiltrantenan a bin haña sa ku e komersiante aki huntu ku su sosio Lindomar Hurtado tabata laga transportá lotenan grandi di Kokaina pa eksterior via di e negoshi di karga ku nan tabatin . Tabata despues ku vários di e lotenan aki a keda interseptá na Spaña, Bèlgika, Italia i tambe Hulanda tur prosedente di Brazil a kuminsá ku un investigashon. Durante di e investigashon segun e kanal di notisia ku a bin detené e yu di Kòrsou Shandel Wilfrido Rosa pa su envolvimentu den transporte di un lote di 2 mil kilo di kokaina. Tabata trata di un investigashon basta grandi unda e sospechosonan tabata hiba un bida super luhoso na Brazil i tambe den eksterior. Durante di e investigashon a bin konfiská un kantidat konsiderabel di tonelada di droga. E kaso ta den investigashon.  Si tin ku bisa ku te ku awe e siudadano lokal aki esta “ Rasta Escalade” ta detené i ainda no a keda presentá den korte pa su kaso wòrdu trata. Vigilante por a komprondé ku e sospechoso aki tabata dominá un  di e favela nan na Brazil òf mihó bisa un di e pueblonan den un di e barionan na Brazil. Esaki ta pone ku e bida den prizon ta bira un tiki mas fásil di loke normal sa ta na Brazil pa e sospechoso Rosa. Ku esaki kier ilustrá ku e video ku a bolbe  bira viral i tabata tópiko di notisia último ta trata di notisia data for di febrüari 2022.