Porto Marie— Segun Miembro di Parlamento pa Frakshon di MFK, Gilbert Doran si bo ke tene un kasamentu na e Playa Públiko “Hunku”, un mener ulandes oropeo ta kobra bo 2 mil florin. Segun Doran esaki no por!

Den su komunikado e ta bisa ku “asina ta e kaso ku e mener ulandes na playa Porto Marie, kende ta kobra bo e kantidat di sèn ei pa por realisá bo kasamentu na playa Hunku, e playa pegá ku Playa Porto Marie”. Segun informashonnan atkerí, e mener ta na Porto Marie i ta atendé ku e tereno pegá ku Porto Marie. Ta konosí ku e tereno pegá ku Porto Marie akí ta un tereno privá, pero no e playa! E tereno tin un bum, kual ta será ku kandal, opstakulisando pasada pa subi esaki. Nada kontra.

Sinembargo, ku e laman ta keda na kosta di e tereno, no ta hasi bo doño di e playa en kuestion, Doran ta bisa. Di e manera akí, habitantenan di nos isla ku ta deseá di sea hasi un fiesta òf kasamentu na e playa menshoná, a skucha via via ku ta e mener ta karga yabi di e bum, pues ku mester tuma kontakto ku e mener. Asina a bin bira konosí ku e shon ta kobra Nafl. 2000,- pa hasi uso di nos playa, riba nos tera, na nos pais! Ta insólito sinta mira e tipo di inhustisianan akí tuma lugá! Unda na mundu bo por sali for di bo pais i bai kobra pa tera ku no ta pertenesé na bo?, Doran ta puntra. Pues NO TA POSIBEL ku ningun hende, for di ningun parti di mundu ta bini i bin manda i restringí e yu di tera pa hasi uso gratuitamente di su playanan!

Doran ta sigui menshoná, si sigui trata e tipo di kasonan akí ku man di felpa, nos ta para bira burla di hende. Pues un súplika ta bai na nos Minister korespondiente, pa aktua ku rapides pa ku e situashon akí i pone un paro na e inhustisia ku ta tumando lugá. Si ta asina’kí ta aktua, anto ta mihó Gobièrnu mes sera tur playa i kuminsá kobra anto. Paso asina sikiera nos sa ku e sèn ku nos ta pagando ta bai den kaha di Gobièrnu, i no den saku i fortuna di otro.