BUENOS AIRES – Yunan di e leyenda di futbòl, Diego Armando Maradona, a pidi outorisashon pa trasladá e restunan mortal di e eterno number ‘10’.

Nan ke trasladá restunan mortal di Maradona for di e santana privá Jardín de Bella Vista pa un monumento spesialmente konstruí na su honor den e bario Puerto Madero na Buenos Aires.

“Ta importante pa mi tata tin e lugá ku e meresé. Un lugá bunita. Ku tur hende ku stim’é por bishit’é”, asina Dalma, e yu muhé mas grandi di Maradona, a deklará durante un entrevista. “Tin algu ku semper e tabata ke, pa ta serka di hende, serka di e pueblo”, asina Dalma a komentá.

“Nos ta spera ku e por tin e lugá ku e meresé, kaminda hende por bai pa laga un flor pe òf pa simplemente bishit’é ”. E yunan di Maradona a entrega un solisitut ofisial pa trasladá su restunan pa e ‘Memorial del Diez’, situá tras di e famoso Casa Rosada na Puerto Madero.