Dishane Nelson kende lo mester sinta un kastigu di 10 aña.

Nieuwe Haven,– E hóben Dishane Nelson (2000) a tende den korte di promé instansha ku e mester sinta un kastigu di 10 aña inkondishonal pa a kita bida di su tata di kriansa na momentu ku  Nelson tabata defendé su mama.

E kaso ku a risibí basta atenshon den medionan di komunikashon i alabes a shòk komunidat di Kòrsou. Un hóben di apénas 21 aña di edat ta kita bida for di un persona pa defendé su mama. E persona ku a fayesé tabata tata di kriansa i pareha violente di mama di Nelson, Duwayne O. Douglas. Nelson a kita bida di Douglas despues ku Douglas a maltratá e mama di Nelson riba un forma basta severo. Promé ku 5or di mainta riba 8 di mei 2022, Douglas lo a dal e mama di Nelson diferente moketa. E moketanan a resultá ku e mama di Dishane Nelson a keda ku wowo blousá i leshon na su man robes.

E maltrato di e mama a tuma lugá na kas dje mama. Nelson a bin haña sa di e maltrato na momentu ku e tabata traha na WTC. Via di whatsapp, e mama a indiká na Nelson ku Douglas a maltrat’é i su kara ta tur plamá. Mesora Nelson a bai na e kas, kaminda den kurá di e kas Nelson a tira ku un arma di kandela, kual a resultá fata pa e pareha violente Duwayne Douglas.

Segun investigashon forénsiko, Douglas a risibí 3 perforashon di bala den área di su pulmon, barika i skouder. En total 6 bala a sali for di e arma di kandela, pero solamente 3 bala e perforá kurpa di Douglas. Tabata djadumingu 8 di mei 2022 alrededor di 05.56’or, ku Sentral di Polis a risibí informashon di un kaso di tiramentu ku a tuma lugá na un kas den Kaya Pachi Jan Bakhuis na Bonam. Alrededor di 6.30 di mainta dòkternan na CMC a konstatá morto di Duwayne Douglas.

Apesar di komprenshon di e situashon wes mr Snitker a dikta un kondena di 10 aña pa Dishane Nelson. E kondena di korte ta asta mas pisá ku demanda di 9 aña hasí pa fiskal di Ministerio Públiko. Segun e veredikto, pa un homisidio un persona por risibí un kastigu di entre 10 aña pa 12 aña. Riba 8 di mei 2022 e akusado ke a yuda su mama debí ku e pareha tabata maltratá e mama. E suseso a finalisá ku Nelson a kita bida di e tata di kriansa kual segun korte ta algu demasiado kostoso. Mirando ku e akusado no tin historia ku hustisia i  e akusado a trata na defendé e mama, korte a dikta un kastigu inkondishonal di 10 aña pa Dishane Nelson. Mas aleu, Dishane Nelson mester paga Nafl 19 mil florin di daño perwisio.