E vakaturanan a sera riba 15 di aprel i a resultá den un totalidat di aplikashon di 70.330 persona riba e vakaturanan di trabou den hustisia.

Willemstad, — Vakaturanan pa trabounan den hustisia a sera 15 di aprel último i tabatin 7.330 aplikashon. Esaki ta un porsentahe di 10% di e forsa laboral di Kòrsou kual ta konsistí di 76.757 persona segun sifranan di 2022.

Ministerio di Hustisia su meta ta pa yena 100+ vakatura pa traha den kadena hudisial. E vakaturanan a sera riba 15 di aprel i a resultá den un total di aplikashon di 70.330 persona riba e vakaturanan di trabou den hustisia. Di un kalkulashon básiko por a nota ku nos forsa laboral na 2022 ta konsistí di 76.757 persona. E  kantidat di solisitashon ta 7.330 persona kual ta kasi 10 porshento di e forsa laboral di Kòrsou ku a solisitá riba e vakaturanan. E resultado aki ta duna un bista miksto mirando ku e meta ta pa yena vakaturanan den ministerio di Hustisia pero den e mesun rosea por bisa ku 10 porshento di e forsa laboral no tin empleo òf no ta satisfecho ku nan situashon aktual komo empleado.  

Ministerio di Hustisia tin 100+ vakatura habri i 150+ kupo di trabou den 15 diferente organisashon ku ta kai bou di e kadena hudisial. Tabatin 10.035 personanan desempleá na 2022 pero no ta sigur kuantu di e poblashon desempleá aki, a solisitá riba e vakaturanan. Lokual si ta notabel ta ku hopi hende a solisitá riba diferente vakatura di e ministerio, pero e pregunta ta si tin sufisiente trabou pa tur e 7.330 hendenan aki. E feria di trabou a tuma lugá dia 22 i 23 di mart último na WTC den kual tabatin un eksposishon di diferente instansia ku ta kai bou di minister di Hustisia. Aña pasá Gabinete Pisas ll a akordá un plan di largu plaso pa asina por fortifiká henter e kadena hudisial i henter e ministerio di Hustisia.

Esaki pasombra segun informashon, pa años gobièrnu tabata hiba un maneho di ‘vacature stop’ pues ta pone ku no tabatin personanan  ku ta drenta den servisio di Hustisia. Konsekuentemente esaki tabata lidia na un situashon den kual personal tabata sali for di servisio i esaki a pone ku e ministerio ta bai atras riba e aspekto di personal.