Entre 22 di desèmber i 27 di desèmber 1000 kobradó di penshun di AOW lo haña un sèn i report’é di 5 porshento ku nan a pèrdè.

Willemstad, — Parlamentario Elvin Gerard a kompartí ku 1000 kobradó di penshun AOV lo risibí un suma entre 22 di desèmber i 27 di desèmber.

Parlamentario  Elvin Gerard di frakshon PNP a menshoná ku entre 22 di desèmber i 27 di desèmber 1000 kobradó di penshun di AOW lo haña un sèn di yanüari 2023 te ku desèmber 2023 ku nan a pèrdè. E sèn ku e penshonadonan ta risibí lo bira 15 porshento kual ta keda igual na lokual otro penshonadonan ta risibí. Ku esaki e penshonadonan su sèn lo bai bira igual na e otro kobradónan di penshun. Pues nan ta risibí sèn bek ku un ‘terugwerkende kracht’ di yanüari te desèmber.

Elvin Gerard a kompartí ku esaki ta un logro di minister Larmonie-Cecilia i partido polítiko PNP. E suma ku penshonadonan lo risibí ta konta solamente pa  e hendenan ku ta biba akinan segun Elvin Gerard di frakshon PNP ta splika. Personanan ku a biba un ratu akinan i bai biba afó no ta haña lokual e 1000 personanan aki ta haña, pero nan lo risibí un otro suma basá riba e ratu ku nan a biba na Kòrsou. Sirkunstansia ta pone ku e penshonadonan aki ta kobra nan penshun promé ku e edat di 65 aña segun e parlamentario ta splika.

Parlamentario Elvin Gerard di frakshon PNP a kompartí ku lo sigui traha na bienestar di penshonadonan, AOV i kobradó di ònderstant. E parlamentario a duna di konosé ku ta atendiendo e asuntu di penshonadonan ku ta kobra APC. Anteriormente den reunion di sala di parlamento, parlamentario David Seferina di frakshon MKF, a hala atenshon pa lokual ta trata fondonan di AOV.  David Seferina a kompartí anteriormente ku  fondonan di AOV ta fluktuá durante añanan i ku e aña di 2022 e fondo aki a konosé un surplus.

Den esaki e David Seferina a menshoná un di e problemanan mas grandi di e fondo aki ta, ku tin hopi estranheronan ku ta bini Kòrsou dos pa tres aña, i ta risibí e mesun derechi riba e suma di AOV kompará ku persona ku a traha for di su añanan di edat yòn. David Seferina a bisa ku esaki no ta hustu ya komo momentu ku e fondo aki tin un défisit, gobièrnu ta tuma medidanan ku ta sali for di benefisio di e persona ku a traha for di su 18 aña.