E aña aki ya a surpasá 2000 persona reportá komo pèrdí.
BOGOTA – Un total di 2.013 persona a keda reportá komo pèrdí na Colombia den e aña aki. Esaki segun sifra nan di e Instituto di Medisina Legal, divulgá pa Krus Kòrá kolombiano.
E datonan aki, segun a keda detayá pa e organismo den un komunikado, ta suma nan mes na e number elevá di añanan anterior. Pues na aña 2022 tabatin 3.659 persona reportá, na 2021 tabatin 3.324, na 2020 tabatin 2.450 i na 2019 tabatin 3.776.
E fenómeno aki ta afektá no solamente e propio víktimanan, si no tambe e famianan, amigunan i e komunidat. Esaki pa motibu ku e ta degradá e vínkulonan familiar i ta afektá e stabilidat di esaki, generando temor i deskonfiansa.
Sifranan di defensoria
432 persona a keda reportá komo pèrdí na Defensoria di Pueblo na Colombia entre luna di yanüari i yüli pasá. Esaki segun loke a keda atvertí pa e organismo den un komunikado.
E Opservatorio di Komportashon Vulnerabel na Derechinan Humano a haña 370 deklarashon ku a registrá 432 víktima di e delitu aki, di kua 322 tabata hende hòmber, 78 muhé i di e otro 23 nan no tin informashon.
E defensor di pueblo, Carlos Camargo, a afirmá ku e debí na e Dia Internashonal di Víktimanan Fòrsá, ta nesesario pa e trabou institushonal keda hasí pa prevení e delitu aki.
E departamentonan unda mas kaso a keda registrá tabata Nariño, ku 40 kaso, Norte de Santander ku 37 i Antioquia ku 35 kaso. Esaki nan a keda siguí pa Córdoba i Guaviare ku 32 kada un, Arauca ku 30, Meta ku 27, Valle del Cauca ku 24 i Caquetá ku 20.
Loke mas ta yama atenshon, ku seis di e departamentonan aki, ta situá na e zona di frontera ku Ecuador i Venezuela.
A agregá ku e zonanan aki ta unda tin e mayor difikultat pa búskeda di personanan reportá komo pèrdí.
Segun e Unidat di Búskeda di Personanan Pèrdí, entre 1948 i 2017 tabatin 103.955 persona reportá komo pèrdí debí na e konflikto armá, di kua 89.782 ta ainda pèrdí.