1.2 mion florin: ta pagando kasi 1.2 mion florin pa un “grupito” por kòrta yerba riba tereno di Isla.

Isla—Atministrashon Finansiero na CRU, durante 2022 i 2023 a paga mesun kompania pre medio mas ku 600 mil florin anual pa kòrta yerba riba tereno di Isla. Esaki a sosodé sin tabatin un destaho públiko, lokual ta rekerí pa un kompania estatal

Un kaso sivil, ku tres empleado/konsehero na CRU a gana kontra di e kompania ta sakando bastante informashon kuestionabel di e kompania. E grupo di empleado, retirá ta alegá di a deskubrí prosedernan interno na e kompania kontra di reglanan di kumplimentu. Manera Vigilante a publiká, un kompania D.G. a risibí mas ku 600 mil florin pa trabounan di kòrta yerba riba Isla durante 2022. Ta bin sali na kla ku mesun òf mas tantu a bai pa e kompania durante 2023 tambe i na 2024 ta sigui den kontrakt ku e kompania ainda. E empleadonan retirá ta sigur ku tin kosnan iregular pasobra ta un kompania chikí di apénas tres hende ta subi tereno di Isla pa kòrta yerba.

E otorgashon di e proyekto pa kòrta yerba,  a tuma lugá sin pasa e prosedernan korekto i alabes no a súplika nota di e alto funshonario enkargá ku aprobashon. Na 2022, CRU a paga 590 mil florin pa kòrta yerba riba tereno di Isla (weeding) miéntras a sigui paga na 2023 i awor tambe na 2024. No tabatin un destaho miéntras den pasado tabatin un kantidat di sinku kontratista tabata hasi e trabou pa alrededor di 1 mion florin. Awor aki ta 1 kontratista tin i ta kobrando lokual 3 kontratista tabata kobra pa mesun trabou òf kisas hasta ménos.

Mas serio ainda, e kompania tin por lo ménos 3 aña ta trahando riba Isla sin tabatin un destaho pa e trabou. Ta trata di un trabou di kasi 50 mil florin mensual i registro na CRU no ta indikativo kuantu hende DG tabata pone riba e trabou, miéntras den pasado weeding tabata duna por lo ménos 40 kupo di trabou. Lokual ta remarkabel den e proyekto di ”weeding” ta ku e proseso di aprobashon no a bai segun proseder interno di e kompania. Manera menshoná, esaki a inisiá un investigashon interno i sondeo ta for di unda ken a duna tarea pa D.G. por tabatin e trabou asina largu sin a gana esaki mediante un destaho públiko. Diripiente, durante di e investigashon a pone e funshonario en kestion riba non-aktif i pa despues dun’é su retiro. A bin resultá ku aparte di e proyekto di weeding, tin mas trabou i entrega na CRU sin tabatin e destaho adekuá.

Riba e presupuesto di CRU pa 2022 tin e kosto di Janitorial (Building and Grounds, including Yard Cleaning). Pa 2022, tabatin un suma riba presupuesto di Nafl. 742.000,=  pa hinter pòst for di kual e kompania D.G. a risibi Nalf 590.000,=. Pa 2023 tambe e mesun kompania a sigui traha sin tabatin un destaho. Riba e presupuesto tabatin un suma di Nafl. 708.000,= for di kual D.G. a risibí mayoria di e pago pa kòrta yerba riba tereno di Isla.

Direktor di HR, Benjamino Goeloe tabata investigando e kasonan di kuestionabel i ta entre nan kende a manda yama pa duna atvertensha. Despues a duna Goeloe i dos funshonario mas nan retiro pero den korte sivil tur tres a bin gana nan kaso.