Patrick Newton, direktor RdK. Interno den e kompania mester di un “scan” riba Kumplimentonan Responsabel.

Isla—Riba facebook Vigilantekorsou, un siguidó riba e plataforma di notisia mas grandi na Kòrsou, a kalifiká e kompania Curacao Refinery Utilities, CRU, komo CRU-el, referiendona e nifikashon di “kruel”.

CRU/RdK entre 2022 pa 2024 a tuma desishonnan ku a kousa bastante prekupashon den komunidat, inkluso eskoho di e konsorsio kuestionabel di Caribbean Petroleum Refinery komo sosio potenshal pa manehá Refineria Isla. Caribbean Petroleum Refinery, manehá pa sosionan venezolano konsientemente a despista Gobièrnu di Kòrsou i tabatin sosten di Refineria di Kòrsou pas hasi esaki. Tin sufisiente prueba tambe pa mustra riba e intentonan konsiente, kual intentonan a inisiá hasta na un investigashon penal, pendiente na Ministerio Públiko.

Refineria di Kòrsou huntu ku Curaçao Refinery Utilities a eskivá sistema bankario responsabel pa risibi 10 mion dòler pa hür parti di e terminal na Bullenbaai. E pago ku a tuma lugá via bankonan na Estádos Unídos, for di Febrüari 2023 a konfrontá problema unda Stern Bank a fris e sèn riba nan kuentanan.  Kasi 12 luna despues ku Refineria di Kòrsou no tabata por a kontesta tur e preguntanan di Stern Bank riba e fuel Oil, a uza un struktura via abogogadonan i kompanianan estado unidense pa risibi sèn di hür riba un lote kontrabanda di fuel oil. E hür di 10 mion dòler, ku Refineria di Kòrsou/CRU a risibi tabatin problema pa risibi, pasobra bankonan lokal i internashonal a rechasá e pagonan, pasobra Refineria di Kòrsou i CRU no tabata por a duna kontestanan riba preguntanan di Kumplimentu Responsabel.

Ta asina ku e problema na inisio di 2023, momento Stern Bank a fris 1.6 mion dòler, destiná pa paga hür na Bullenbaai. E pagonan mester a bini for di e kompania SOCAP, ku tabata preferred bidder di RdK pa manehá Refineria Isla. Socap a risibi 2.8 mion dòler for di KNOB Trading pa kuminsá paga CRU na Kòrsou. Pero niun depchi no a yega CRU. E banko korespondiente na  Estádos Unídos, STERN Bank a blòkia 1.6 mion dòler, miéntras ta sospechando ku 1.2 mion dòler den e transakshon tambe a somentá, pasobra te ku awe, KNOB Trading a keda sin risibi 1.2 mion dòler bek for di Socap.

Bankonan internashonal, for di Febrüari a blòkia pagonan di hür pa Bullenbaai, lokual tabata netamente e motibu dikon mester a bai manda e fuel oil findishi pa RdK por a risibi su sèn. A keda konstatá ku e fuel oil, no tabatin kumplimentunan OFAC i mirando e restrikshonnan e temporada ei di Estádos Unídos, bankonan tabata blòkia tur aktonan petrolero kuestionabel, manera e lote kontrabanda ku tabatin den tankinan na Bullenbaai.

Tabata riba 3 di yüli 2023, ku Banco di Caribe a bati alarma pa mas informashon. Den un karta pa CFO na Refineria di Kòrsou, e banko lokal a manda puntra un seri di pregunta. Ta trata di preguntanan  riba Caribbean Petroleum Refinery, eks sosionan i kompanianan ku a partisipá den entrega di e fuel oil. E preguntanan a bini despues ku un seri di pago pa hür di Bullenbaai, ku mester a traspasá riba kuentanan di Banco di Caribe. Tabata Hans Visssers, CFO na RdK kende a risibi e preguntanan. Lokual e banko tabata kier sa ta un seri di informashon riba kumplimentunan responsabel, pa e banko no konfrontá problema internashonal. Hans Vissers no tabata por a duna tur e kontestanan, pasobra e lote di fuel oil tabata un entrega di produkto hòrtá na Venezuela ku e propietarionan tambe a keda enkarselá durante un investigashon masal unda PDVSA a pèrdè kasi mei bion dòler na produkto.

Manera menshoná, Stern Bank tabata kier sa ku e sinku pagonan ku Socap, na nòmber di Caribbean Petroleum Refinery a hasi, tabata pa alokashon di e fuel oil i ta di ken e kargamentu di fuel oil na Bullenbaai tabata. Spesífikamente e banko kier sa ta ken ta propietario di e fuel oil na Bullenbaai entre Òktober 2022 pa Febrüari 2023.  Tambe Stern Bank kier sa ta di unda e fuel oil a bini. Mester a bini tambe klaridat riba e proseso di fakturashon. E relashon entre Socap (e kompania ku a gana e bidding pa Isla) i CPR tambe ta importante pa e banko korespondiente. Pa por logra los e pagonan, e banko a sigui puntra bastante pregunta aklaratorio. Ta lógiko ku tantu Banco di Caribe, komo Stern Bank no kier kore riesgonan di sanshon. Entre Febrüari pa Mart 2023, tabatin un suma di 2.7 mion dòler estado unidense ku mester di aklarashon.

Esaki ta konfirmá ku RdK i CRU a risibi 10 mion dòler for di un transakshon ku for di Yüli 2023, CFO di RdK tabata na altura di tabata un transakshon ku bankonan internashonal no a konfia. Entretantu mesun fuel oil ku e bankonan internashonal i lokal a kuestioná, a keda bendí na un kompania estado unidense. E kompania yama Grey Rock Gathering, un kompania intermediario ku ta solushoná entre otro produktonan ku no por los fásil. Nan a uza e bufete di abogado rekonosé den konseho petrolero, Phelps Dunbar. Grey Rock Marketing a depositá e 10 mion dòler riba kuentanan escrow di Phelps Dunbar i na momento e fuel oil a drenta e tènker Seasonator  i los bai rumbo St Croix, Phelps Dunbar a depositá riba e kuentanan bankario di Refineria di Kòrsou na Wells Fargo. Riba mesun kuenta ku tabata kuestioná pa Stern Bank na Yüli 2023 riba un transakshon ku Socap tabata kier a hasi na Febrüari 2023.