Go Fast: 23 di febrüari ta bin mas klaridat riba GPS pa kisas splika kon un Go Fast por disparsé riba laman. Narkonan riba laman ta akusando e botonan FRISC di Warda Kosta di ta drentando awanan venezolano.

Nieuwe Haven—Hues di Korte Penal den Promé Instansha, Sigmar Carmelia, a súplika Ministerio Públiko pa ordená Warda Kosta pa un klaridat. Pa 23 di Febrüari próksimo, e klaridat mester ta na disposishon di abogadonan defensor, mr. Eisden, mr. Dickens i Themen Cairo.

E honorabel hues den Korte Penal mester a tuma su tempu i skors tratamentu siman pasá djarason pa tuma un desishon ku tin algun tempu ta kologando durante tratamentunan na Nieuwe Haven. Ta trata di e problemátika di GPS riba yolanan (Go Fast) riba laman ganchu na momento Warda Kosta interseptá nan. Djarason último, tabatin un tratamentu mas. Pero e biaha aki, korte a duda den informashon suministrá pa Warda Kosta. E datonan den e GPS di e yola, no tabata kuadra.

Djarason último, tabatin 5 hòmber venezolano dilanti korte pa nan tratamentu. Pero en realidat tin por lo ménos 15 Narkotrafikante venezolano ta akusando Warda Kosta di ta drenta nan awanan unda nan no tin outoridat pa interseptá. E akusashonnan ta andando for di Yüni 2023 pero djarason último datonan nobo ta lanta preguntanan si en bèrdat e akusashon di e narko-nan ta bálido. Ámbos grupo insistentemente a deklará riba nan duda abase di nan GPS ku ta kontradiktorio na lokual Warda Kosta a indiká. Djarason último a bini mas desaroyo ku Fiskal di Ministerio Públiko mr. Hara tampoko no por a duna un kontesta. E kordinatonan indiká pa Warda Kosta no por a aklará korte miéntras tin sospechoso bastante konkreto ku hasta unu di e Go Fastnan a disparsé fo’i radar.

Unu di e dos gruponan ta dudando segun nan deklarashon momento e botonan di Warda Kosta a yega nan tabata apénas 7 mia for di kosta venezolano. Segun nan deklarashon, nan destino no tabata Kòrsou i na momento e fregata di Marina a interseptá nan lancha, ainda nan tabata mira e lusnan na kosta di Venezuela.  Esaki ta e grupo di e hòmbernan, Jose Pacheco, Adrian Delcine, Xavier Delcine, Javier Guillen Lopez, Jose Rodriquez, Neomal Cedeno, Wreyner i Urbina Sovil. Nan tur shete a risibi kastigu di prizon. Pero, for di un otro grupo di 5, Damni Gabriel Mata Salazar 1990 Venezuela, Jose Alexander Salazar Louis 1988 Venezuela, Fransisc Javier Solo Trillo, Juan Antonio Salazar Carrion 1959 Venezuela i Diogenes Ramon Lugo Arias 1958, e informashon riba GPS a duna mas tantu duda ku a hisa wenkbrouw di e tres abogadonan den korte.  Pero nan deklarashon ta mas fuerte si kompara e GPS den nan kaso. Korte a posponé tratamentu di nan kaso pa buska mihó informashon riba e GPS i konsulta eksperto.

For di Yüni 2023, prinsipalmente despues di 24 di Yüni tabatin un seri serio di akusashon kontra di Warda Kosta despues ku riba 23 i 24 di Yüni e barku di Marina Real,  Zr.Ms. Groningen  a interseptá dos Go Fast kargando 2 mil kilo di droga, inkluso kokaina i mariwana. En prinsipio no tabatin nada partikular den e interseptashonnan pero ta trata di 12 venezolano, repartí den un grupo di 7 i un otro grupo di 5.

Durante un otro kaso, abogadonan defensor a mustra den korte, kon un Go Fast tabata nabegá banda di e unidat FRISC di Warda Kosta, unda e kapitan tabata mustra riba su GPS indikando ku nan ta den laman di Venezuela. Segun Warda Kosta, nan tabata den laman internashonal pa interseptá un Go-Fast ku tabata karga alrededor di 1600 kilo di kokaina. Despues ku warda kosta a logra stòp e motornan di e Go-Fast, un warda kosta Merikano lo a tira e kapitan dje Go-Fast den su kara. Mesora e hòmber a muri debí na su herida.  Riba e grabashon di vidio, por a nota kon trankil e nabegantenan di e Go Fast tabata papia ku Warda Kosta indikando nan riba nan GPS i gritando “Venezuela Venezuela”.

Diferente abogado a lansa e krítika den korte na Nieuwe Haven. 23 di Febrüari, kisas lo bini klaridat riba e problema ku hasta a yega Parlamento di Kòrsou.