Willemstad, — Famianan di algun piskadó ta sumamente prekupá despues ku Warda Kosta Venezolano a detené nan bai ser  kuné.

Ainda no ta konosí kiko por ta e motibu ku Warda Kosta  Venezolano a konfiská un boto piskadó lokal ku algun piskadó lokal riba dje i asina a bai tera ku nan na unda awor aki nan ta enkarselá. Ta trata di un boto lokal ku  tripulante lokal ku sa bai Islanan di Aves pa asina buska piska pa abastesé e merkado lokal. Resientemente na momento ku e boto aki tabata hasi e trámitenan pa sali for di awa teritorial di Venezuela i  regresá nos awanan teritorial, Warda Kosta Venezolano mester a duna òrdu na e boto di piskadó  pa esaki para. ‘E paramentu di e boto piskadó  lokal riba laman no a bai sin insidente na unda  Warda Kosta mester a los bala pa asina por a para e boto. Despues di esaki mesora e tripulante a keda detené i a konfiská e boto. No ta konosí kiko por tabata e motibu ku a para e boto i a konfiská esaki pero si despues di e aresto riba laman e tripulantenan por tuma kontakto ku konosínan i tambe famianan aki na Kòrsou ku e notisia ku outoridat Venezolano ta pidiendo basta plaka pa asina por laga nan den libertat.

No ta promé biaha ku algu asina a yega di tuma lugá unda por kòrda algun aña pasa kon un grupo di 5 persona ku a sali Kòrsou pa bai buska piska ku karko na Aves tambe a keda detené  i a pasa basta luna detené na Venezuela unda outoridatnan i tambe abogado kada bes tabata manda pidi sèn pa asina nan por haña nan libertat. Tabata te despues ku Minister Presidente Pisas a logra intervení ku outoridatnan Venezolano a bin duna e persona nan aki nan libertat di manera ku nan por a regresá Kòrsou. Awor aki un biaha mas tin otro situashon ku piskadónan òf buskadonan di piska ta detené i ta pidi plaka a kambio di nan libertat.