Konstrukshon HNO: hinter e proyekto di HNO ta falta dokumentashon importante pa realmente investigá.

Otrobanda—Parlamento di Kòrsou ta pendiente un reunion riba e situashon di salubridat públiko unda e.o.  tópiko di CMC ta bolbe subi mesa.

E kosto di kuido médiko na Kòrsou ta oumentando i no mester ekskluí un intervenshon estatal, na Curaçao Medical Center. E rapòrt di akountent 2020 a konkluí ku e desishon di kambio riba e sitio di konstrukshon ta unu di e motibunan prinsipal dikon Kòrsou no por afòrt e sentro di kuido nobo.

E historial pa kambia di tereno di Amstel pa Otrobanda a inisiá despues ku Pueblo Soberano a drenta Fòrti. Riba 7 di yüni 2013, kabinete Ajses a drenta Fòrti, riba 27 di yüni 2013 e tim di Ballast Nedam Infra i USONA a wòrdu invitá pa bini Hunta di Minister. Durante e reunion aki a kuminsá diskutí e posibilidat di kambio den lokalidat di hòspital. E senario nobo mester a bira Otrobanda en bes di tereno na Amstel. E desishon a resultá den un kambio mionario na kosto di konstrukshon i operashon . Hunta di Minister,  a eksihí pa Ballast Nedam, rekalkulá i hasi un estudio pa e lokashon nobo di Colon. USONA tambe a bai di akuerdo pa huntu ku VVRP, studia e posibilidat di un lokalidat nobo den área di Otrobanda. 3 siman despues, riba 17 di yüli 2013, Ballast Nedam ta entrega  USONA resultado di su estudio. Ta trata di kambionan drástiko den volúmen di e konstrukshon i inkomparabel ku e akuerdonan di konstrukshon inisial. Dokumentashon riba e proseso di desishon abase di e estudio di Ballast Nedam a disparsé.

Hunta di Minister na 2013 a kuminsá mobilisá pa kambia destinashon di e hospital pa Otrobanda, pero tabatin problema ku lugá di stashoná outo. Konsekuentemente, riba 6 i 25 sèptèmber, Ballast Nedam Infra a traha un presupuesto inisial pa e stashonamentu di vehíkulo. E presupuesto di 25 di sèptèmber a disparsé i no ta optenibel, Riba 6 desèmber tambe Ballast a laga traha un prekalkulo di e konstrukshon ku nunka mas no a paresé. I na 19 desèmber, 13 dia despues a tene e “groundbreaking” ofishal di HNO na Otrobanda. Te awe niun hende no por haña e dokumentashonnan ofisial di kalkulashonnan.

Pero hinter e proyekto di HNO ta falta dokumentashon importante pa realmente investigá. E fayo mas grandi tabata den man di e gobièrnunan di 2013, 2014, 2015, 2016 i 2017. Durante ningun di e aña korespondiente, SONA no a entrega su kuentanan anual pero gobièrnu di Kòrsou a sigui paga SONA durante e periodo ku SONA tabata guia i manehá e proyekto di HNO. HNO/CMC a bira entretantu un prekupashon nashonal pa finansiá.