DEN HAAG—Den e promé tres lunanan di 2024 un kantidat di 12.055 solisitante di asilo a drenta Hulanda, ku ta 36% mas ku den mesun periodo 2023.

Tantu e petishonnan pa asilo komo pa famia a subi, segun Ofisina Sentral di Estadistika CBS a base di sifranan nobo di Imigrashon i Naturalisashon (IND). Den promé kuartal di aña un kantidat di 8.965 di petishon di asilo den Hulanda. Esaki ta 29% mas ku den mesun kuartal 2023. 30% di petishonnan a keda entregá pa hendenan di Siria, ku ta 2.900 petishon. Esaki ta un oumento di 86% kompará ku mesun periodo den 2023. Di Irak tambe a drenta hopi petishon di asilo, ku ta 1.190. Esaki ta kasi 5,5 biaha ku e promé kuartal 2023. Despues di Siria i Irak mayoria petishon a drenta di Turkia (495) i Jemen (470). Ta trata di prinsipalmente di hombernan ku a pidi asilo den prome lunanan di aña. Mayoria di nan ta riba 35 aña, 25% ta menor di edat. Banda di e kantidatnan di petishon asilo, e kantidat di petishon pa famia tambe a subi. 3.090 hende por a drenta Hulanda den promé tres lunanan pa reuní ku nan famia ku a haña asilo. Esaki ta un oumento di 62% kompará ku promé kuartal 2023 (1.905). mayoria famia ta bini di Siria: 2.310. Mas aleu, famia ta bini di Yemen, Turkia i Irak. Mayoria di nan ta hende muhé. Algun mas ku mitar di nan ta bou di 18 aña.