Back to Top
Responsive image
E korant di pueblo

40 mion florin ménos na impuesto durante promé kuartal


May 25, 2021 • 2 minüt pa lesa

Ménos: kompará ku promé kuartal di 2020, te ainda durante mesun periodo a drenta 40 mion florin ménos na impuesto.

Punda—E kaha di gobièrnu ta sigui deteriorá despues ku ménos entrada na impuesto a drenta durante promé kuartal di 2021, kompará ku 2020. Esaki ta lokual un komparashon di entrada na impuesto ta konkluí pa lokual ta trata e lunanan di Yanüari pa Mart.

E konklushon mester ta motibu di prekupashon pa gobièrnu di Kòrsou. E sifranan di 2021 te ainda  por ta indikando gobièrnu lo risibi 160 mion florin ménos na impuesto kompará ku 2020, kual ya tabata un mal aña kompará ku 2019. Sin logra baha su gastunan pa 2021, e efekto negativo lo ta mas grandi ainda pa e posishon di likides.

E desepshon mas grandi ta den e kategorianan di Impuesto riba Salario (LB) i di Benta (OB). Na 2020 gobièrnu a logra kobra 111 mion florin na impuesto riba salario miéntras na 2021 durante mesun periodo entre yanüari pa mart, a drenta 102 mion florin. Pa lokual ta trata e sifranan di OB, na 2020 a kobra 122 mion di yanüari pa mart miéntras na 2021 e suma tabata 102 mion florin. E bahada den Impuesto riba Benta ta indikativo na lokual Banko Sentral a kalkulá pa e bahada den Produkto Nashonal Brutu di kasi 20%. Kòrsou simplemente ta hasiendo ménos negoshi. Bale la pena tambe menshoná e bahada den Derechinan di Importashon. Na 2020, durante mesun periodo 33 mion a drenta kaha via pagonan pa Derechi di Importashon. Segun sifranan ofisial di gobièrnu na 2021 te ainda a drenta 30 mion na Derechi di Importashon. Esaki tambe ta un indikashon ku Kòrsou ta importando ménos i por ta skapando divisas, anke pa konsumo lokal esaki no ta muchu bon notisia.

Na 2020, Kòrsou a kobra 1.2 Miar florin na Impuesto. Esaki ta kaso 300 mion ménos di lokual tabata riba presupuesto. E  aña aki, segun sifranan preliminar di 2021, por spera 160 mion florin ménos kompará ku 2020, lokual por e kobransa total na alrededor di 1 miar florin lokual ta kasi 500 mion florin ménos kompará ku 2019.

Login