Minister Hoekstra

Punda— Hulanda su portanan ta hanchu habri pa tantu emigrantenan ront mundu i turista tur parti di mundu, mientras pa islanan ABC solamente 200 turista venezolano por drenta pa luna. Durante  2022 mas migrante a drenta Hulanda ku den 2021. Ta trata di un total di 403.000 stranhero ku por a drenta pa bin biba.

Na e momentunan aki Kòrsou ta pèrdiendo un oportunidat serio di hasi turismo ku Venezuela, prinsipalmente awor ku frontera a habri. Pero Hulanda ta hasiendo difísil atrobe.  Gobièrnu Hulandes,  ta permití pa saka solamente 200 visa for di Caracas, pa tur Venezolano ku kier biaha pa drenta Reino Hulandes, inkluso Hulanda, Aruba, Kòrsou i Boneiru. Pero na 2022, nan portanan si tabata hanchu habrí pa drenta. Durante 2021 298.000 a drenta nan pais i awor na 2022 403.000.  Ku esaki migrashon na Hulanda pa promé biaha ta mas ku den 2019, e aña promé ku e pandemia di corona, segun Ofisina Sentral di Estadistika CBS. E motibu prinsipal di e oumento ta e guera na Ukraina, 108.000 migrante a hasi uso di e areglo temporal di protekshon Oropeo. Ku e areglo ukrainonan tin derecho den Hulanda riba akomodashon i kuido médiko. Tambe nan por traha na Hulanda i por keda te mart 2024. Banda di e guera na Ukraina e otro motibunan pa oumento di migrashon ta trabou i famia. CBS ta indiká un oumento di 65% di migrantenan laboral.

Pa Kòrsou entrada di turista venezolano ta limitá. Esaki ta nifiká, ku na ningun momento gobièrnu hulandes no tabatin ningun klase di interes pa yuda islanan ABC dor di permití pa habri frontera ku e pais bolivariano. Un situashon insolito. Gerensha di e.o. Laser i demas kompanianan aéreo ku kier bula entre Kòrsou i Venezuela tin nan man na kabes apesar di tur nan intentonan pa por trata na logra haña biaheronan entre Venezuela i Kòrsou.

Na Hulanda, mayoria emigrante ta prosedente di India, tambe di Rusia i Turkia. Mas aleu, tabatin un oumento di 35% di hendenan ku a reuni ku famia. E kantidat di rusonan den e kategoria aki a subi ku 30% kompará ku añanan anterior. Di e 46.000 migrantenan asilo mas di mitar (52%) a bini di Siria. Tambe a drenta relativamente hopi migrante di Jemen, Afganistan i Eritrea. Tambe a drenta 120.000 migrante di Union Oropeo of zona Oropeo. Esaki ta 9000 mas ku den 2021. Segun CBS 75% di e grupo ta regresá nan pais denter di 10 aña. nan ta bai mas lihé ku migrantenan pafó di Union Oropeo

Pa lokual ta trata Kòrsou, na e momentonan aki ya pa Yüli, niun siudadano èkstra pa bula bini islanan ABC for di Venezuela no por pasobra e 200 kuponan ta yena kaba. E merkado, ku den pasado tabata esun ku mas turista pa Kòrsou, ta hermetikamente será i Hulanda no tin niun intenshon di fasilitá esaki tampoko. E responsabilidat pa duna e turista venezolano visa pa biaha pa Kòrsou ta responsabilidat di Hulanda. E pais oropeo, tin su fronteranan hanchu habri pa tur sorto i tipo di refugiado kana drenta rònt mundu sin un visa, pero pa Kòrsou risibi un turista for di Venezuela mester di visa.  E responsabilidat pa duna e turista venezolano visa pa biaha pa Kòrsou ta responsabilidat di Hulanda. E pais oropeo, tin su fronteranan hanchu habri pa tur sorto i tipo di refugiado kana drenta rònt mundu sin un visa, pero pa Kòrsou risibí un turista for di Venezuela mester di visa.

Direktor di ofisina di turismo, Muryad de Bruin a indiká na Vigilante ku CTB ta opiná ku Kòrsou mester keda habrí i aksesibel pa bishita, pero den mesun rosea de Bruin ta splika ku CTB no por buta preshon pa habri Kòrsou. “Tin muchu mas kos ku solamente turismo, entre otro seguridat di frontera, tratado i palabrashon nan internashonal i akinan CTB no por duna un rekomendashon”. Tambe de Bruin a indiká ku turismo for di Repúblika Dominikana tin mesun situashon kaminda turistanan mester tin un visa pa yega Kòrsou, pero CTB no por buta preshon pa eliminá e visanan.