Kampaña: na 2019 e dos kompanianan tabatin proyektonan di “Good Will” pa bende e desishon di benta mas mihó.

FÒRTI AMSTERDAM—Tin por lo ménos 43 mion florin di pagonan na tersera parti sin tabatin e transparensha nesesario na Gobièrnu i Pueblo di Kòrsou, den benta di UTS. Apesar di tin lista si e institutonan ku a risibi pago, no tin sufisiente informashon pa evaluá e pagonan na kumplimentunan responsabel.

Na momentu di benta UTS tabatin un debe di 78.2 mion florin na bankonan i demas institutonan finansiero. Tambe tabatin obligashon na Fondonan di Penshun di kasi 86 mion florin. Riba un skema di splikashon riba e benta tabatin kanselashon di 42.5 mion na “otro debenan”. Akshonista di Kòrsou, no tin niun informashon ken ta e kreditornan menshoná bou di e suma di 42.5 mion. E kombinashon riba un bolsa di debe sirkulante na 42.5 mion florin, kombiná ku posibel retraso den fondonan di penshun ta indikadónan bastante serio di un mal maneho pa un kompania ku tabatin monopolio. Aparte di e debenan na banko, fondo di penshun i kréditornan komun, UTS tabata kargando mas debe mionario. Pagonan di impuesto atras a yega te na 6.1 mion florin. Tambe mester a kanselá derechinan riba konseshon, kual un parti tambe tabata retrasá na 15.2 mion i finalmente un debe adishonal di 6.5 mion florin. Riba niun di e debenan menshoná, akshonista na e momentonan aki no tin informashon. Pa lokual ta trata 43 mion florin, te ainda no tin transparensha riba e pagonan i kanselashon. No ta konosí tampoko si ta trata di pago na provedornan di e kompania.

Lokual a sobra neto, despues di paga tersera parti for di e benta di UTS tabata apenas 72 mion florin, lokual nunka no a laga hasi un evaluashon di e esei tabata e balor di e kompania (neto). E 72 mion, no tabata ganashi sino a kalkulá kuantu e kompania lo tabata bal sin su debenan. Mester bini un investigashon amplio riba e benta di UTS. Pa mas ku 5 aña e dil entre FLOW i UTS a sigui hermetiko. Hasta akshonista mayó, Gobièrnu di Kòrsou no tin informashon mas riba e benta. Minister di Finansas aktual, Javier Silvania tin 2 aña buskando informashon riba e benta i distribushon di e kapital. For di e 72 mion florin ku supuestamente s obra, mester dedusí e balor di aktivonan riba balans, kual tabata 52.7 mion florin. Esaki ta nifiká ku Kòrsou a “nèt” apénas 19.3 mion florin for di 339 florin ku nan a bende UTS.

Gobièrnu di Kòrsou, komo akshonista den UTS a risibi na “kèsh” solamente 72 mion florin for di benta di UTS na 339. Unda e demas mionnan a bai te ainda ni parlamento di Kòrsou ni tampoko gobièrnu mes por splika. Mayoria di e benta generá a bai pa paga e.o., kréditornan, penshun i debe na institutonan finansiero. Pero un spesifikashon di unda realmente e sèn a bai nunka no a keda presentá den parlamento pa por responsabilisá e informashon na pueblo. Un otro parti a bai komo fiansa na Curaçao Medical Center pa finansiamentu di su kapital sirkulante, kual e instituto mester ta pagando bèk.