HULANDA,– Korte penal ayá na Den Haag a duna nan kondená relashoná ku un kaso kontra di un hòmber nasé na Kòrsou na 1983. E hòmber a keda kondená na un kastigu di 5 luna pa benta di droga.

Entre 2 di dezèmber 2023 pa 12 di yanüari 2024 outoridatnan ta sospechá e hòmber di a bende droga riba diferente okashon den área di siudat Hulandes, Zoetermeer. Segun e akusashon nan e hòmber lo a entregá, transportá i duna diferente servisio relatá na droga. Ta trata dje droga kokaina. Tambe polisnan a haña ku e hòmber tabata den posishon di 14.9 gram di kokaina na momentu ku el a keda detené.

Korte a duna nan veredikto den e kaso aki i a indiká ku un kastigu di 5 luna ta na su lugá pa e hòmber YDK. Komo prueba hues a indiká ku 9 diferente prosès ferbal a keda usá komo prueba kontra di e hòmber. Segun e pruebanan e hòmber lo a bende 1 luna largu diferente droga den e área, kual segun korte ta algu ku ta perhudiká salubridat públiko. Ademas, korte a para ketu ku uso di kokaina ta algu ku por krea adikshon. Tambe korte den promé instante a evaluá e karchi di kastigu di e akusado. Segun e karchi di kastigu e akusado a keda kondená den pasado pa echonan similar. 

Banda di e kastigu di 5 luna, e akusado mester sigui risibí guia obligatorio di reclasering.