AMSTERDAM—Outoridatnan spaño a interseptá 6000 kilo di hash sur di islanan Kanaria rumbo pa kosta Oropeo.

Outoridatnan a desmantelá un ret kriminal spaño ku ta vinkulá ku un organisashon kriminal grandi hulandes. Sinku persona a keda detené i tabatin entradanan den varios siudat na Spaña. Na Spaña a detené e lider di organisashon kriminal ku ta opera den varios pais Oropeo. Banda di hash e organisashon tabata produsí droga sintetiko tambe. E entradanan tabata den provinsianan di Alicante, Murcia, Las Palmas i Madrid. Outoridatnan a konfiská plaka, botonan i vehíkulonan. E investigashon a start for di 2020 kaminda a haña pista di un yate na e isla Lanzarote, ku polis tabata sospecha di transporta kontrabanda. Investigashon riba e yate a kondusí na un organisashon di droga grandi na Hulanda. Polis spaño a traha ku reshershi hulandes. E yate ta pertenese na e organisashon hulandes. No tabatin detenshon di hulandesnan na Spaña.