DEN HAAG–Hospital Haga na Den Haag a duna retiro inmediato na 5 enfermera ku a hòrta remedi.

Esaki e hospital a deskubrí despues ku a pone kamaranan skondí den e departamento. Ta trata di 5 enfermero ku tabata traha den departamento di parto. Un bosero di hospital ta splika ku no ta duna detaye riba kasonan individual. Pero e hospital ta splika ku ladronisia no ta wordu tolera. No ta importá kiko nan a horta pasobra tur material ta pa tratamentu di pashentnan i no pa uso personal. No ta aseptá ladronisia den ningun sirkunstansha. 5 otro enfermero a tuma retiro pa malkontentu ku ponementu di e kamara. E promé sospecho tabata momentu ku a ripara ku remedinan tabata disperse for di kasha. Ta trata di remedinan kontra stress i ansiedat, manera oxazepam i temazepam. E hospital seguidamente a pone kamaranan skondí. E personal no tabata sa di nada. Pa e motibu aki otro personal a tuma retiro pa malkontentu. Ponementu di kamara den un hospital ta permiti pa lei di protekshon di persona si tin un motibu hustifiká, manera sospecho serio di robo. E skarsedat di personal no ta un situashon duradero pasobra menos parto por tuma lugá segun e bosero. A buska personal temporal te ora haña personal permanente.