WILLEMSTAD, — Resientemente Kòrsou tabatin e honor di risibí 85 agente di biahe argentino den kuadro di e di 13 enkuentro anual di ‘Copa Vacations Argentina’. Ta promé biaha ku un grupo asina grandi di agente di biahe for di Argentina a bishitá Kòrsou. Meta di e bishita di 3 dia tabata pa laga e agentenan di biahe sera konosí i eksperensiá Kòrsou, pa asina nan por bende nos destinashon mas mihó ainda bou di argentinonan.

E programa a inisiá ku un fiesta di apertura kaminda Minister di Desaroyo Ekonómiko sr. Ruisandro Cijntje a trese un palabra di Bon Biní dilanti invitando e agentenan di biahe pa nan disfrutá i sinti pa nan mes kiko Kòrsou tin di ofresé.

E siguiente dia e agentenan di biahe a bishitá diferente hotèl pa sera konosí ku e atributonan ku kada hotèl ta ofresé. Ku e konosementu aki, e agentenan di biahe por konsehá nan klientenan kua ta e akomodashon ku ta pas mihó ku nan. Na final di e di dos dia, Ofisina di Turismo di Kòrsou (CTB) a organisá un fiesta kantu di laman kaminda e agentenan di biahe por a eksperensiá diferente aktividat akuátiko manera sea-doo, kayak transparente i water bikes.

E delaster dia, e grupo a partisipá na un Willemstad tour den trolley train i riba scooter eléktriko pa sera konosí ku Kòrsou su kultura i historia. Pa finalisá e programa e agentenan di biahe a disfrutá di un tour riba barku pa konosé Kòrsou via di laman.

E bishita na Kòrsou a forma parti di un programa mas amplio kaminda riba invitashon di e operadornan, Copa Vacations, Delfos Tours, Logan Travel, Siga Turismo, Top Dest i Tower Travel, e agentenan di biahe a eksperensiá 3 diferente pais di kual Kòrsou tabata unu di nan. Banda di Kòrsou e agentenan di biahe a bishitá tambe Panama i Aruba.

Argentina ta un merkado kresiente pa Kòrsou. CTB ta kontentu ku e kolaborashon ku partnernan di sektor privá pa asina por a mustra e diversidat ku Kòrsou ta ofresé.