Karyl Bertrand

WILLEMSTAD—Na 2001 tabata e promé biaha ku abogado Karyl Bertrand a partisipá na un kongreso di INTA (International Trademark Association) ku ta konta ku mas di 35 mil miembro prosedente for di mas ku 180 pais. INTA ta e asosashon di mas grandi na mundu ku ta atendé ku marka i otro derechinan di propiedat intelektual.  

E direktiva di INTA ta keda nombra pa 2 aña i abogado Karyl Bertrand, kende ta dominá aspektonan di marka i propiedat intelektual, a keda aserka pa drenta den e komishon ku ta duna e presidente i CEO i restu dje direktiva konseho tokante topikonan global ku ta afekta derechinan di propiedat intelektual, spesialmente den paisnan di Latino Amerika i Karibe. 

E konferensianan di INTA ta konta ku mas di 10 mil partisipante di primordialmente huristanan di rònt mundu ku ta spesialisa den asuntunan di marka. Entre 18 pa 22 di mei tin e próksimo konferensia di INTA kual lo tuma lugá na Atlanta, Merka, i den kuadro di esaki mr. Karyl Bertrand a keda aserka pa forma parti dje tim ku ta duna konseho na e esnan ku ta dirigí e organisashon pa e periodo 2024-2026.  

E la aseptá e reto i asina kombertí su mes den e promé yu di Kòrsou ku ta logra un puesto asina importante den INTA. Anteriormente e tabata pa un periodo di 4 aña den e Komishon Anti Pirateria, den kua na nòmber di INTA el a guia seshonnan di informashon na Jamaica i tambe aki na Kòrsou, aparte di presentashonnan na New York, Merka.

 Tambe e tabata orado na Sint Maarten riba invitashon di Bureau for Intellectuel Property of Sint Maarten i Ministerio di Hustisia di Sint Maarten. Ademas ela forma parti pa 2 aña di e komishon Komersialisashon di Marka ku ta atende entre otro ku merkadeo i promoshon di marka, franchising i balorisashon finansiero di marka. Su konosementu a trese kuné ku n’e momentunan aki e ta na kabes di un sub komishon di INTA, ku ta atendé ku Asosashonnan di Sostenibilidat i Standardnan Étiko.