ROTTERDAM—Alrededor di 600 pasahero a keda mas ku un ora pegá den trein entre Rotterdam Lombardijen i Barendrecht.

Nan intercity ku direkshon Eindhoven a keda para. E motibu ta un problema tekniko segun NS. Pa kolmo airco a kai afo den e trein. E mashinista no a logra start e trein. Despues di 70 minut a yega un trein di evakuashon pa tuma e pasaheronan. E kalor a pone ku sigur un pasahro a bira malu. E pasahero a haña asistensia di personal di ambulans i por a sigui su ruta. Finalmente e pasaheronan a yega ku dos ora di retraso Eindhoven. Riba media sosial hendenan a keha di kalor den e trein. NS ta yama e insidente hopi ferfelu. Un fayo tekniko semper ta ferfelu pero sigur awor ku e temperaturanan haltu. Un ora despues tabatin otro defekto tekniko ku a pone un trein para entre Den Bosch i Tilburg. E trein tabatin 300 pasahero nab ordo. Den e kaso aki dos sprinter a tuma e pasahero pa transporta nan.

Nan a yega Tilburg ku dos ora di retraso. Bosero di NS ta bisa ku ta pa kasualidat dos trein a daña pasobra ta trata di dos diferente tipo di trein. Un pasahero ku tabata den trein a bisa Omroep Brabant ku e kalor den trein tabata insoportabel pasobra e trein tabata yen i airco a kai afo. Tabatin diferente hende ku a desmaya. Personal di NS a parti boter di awa pero esaki no tabata sufisiente.