Prekupá: funshonarionan di ambulans na yegada a konstatá e situashon delikado di e pasahero pegá den outo.

Otrobanda—Un hòmber kende a yega Curaçao Medical Center riba djamars atardi lat despues di un aksidente riba Welatinaweg, a keda bou di opservashon kritiko. Esaki ta lokual fuentenan na CMC a duna di konosé na Vigilante.

Tabata den oranan di djamars atardi ku outoridat polisial a bin haña un hòmber di edat hóben pegá den un Lancer blou riba Welatinaweg. A bin haña e hòmber  pegá riba e asiento den e vehíkulo, miéntras shofùr di e vehíkulo no tabat’ei. A resultá despues ku e hòmber lo tabata kore ku un hóben di 15 aña den outo, momento e vehíkulo a pèrdè kòntròl i bai pega den un poste di lus riba Welatinaweg. Su situashon ta di prekupashon i médikonan tin’e bou di opservashon intensivo despues ku e la drenta CMC djamars atardi,

Polis ta investigando e aksidente, despues ku e hóben shofùr di 15 aña a presentá na e sitio kehando di doló unda el a afirmá di tabata manehá e vehíkulo. Na e sitio a kuminsá duna e tambe tratamentunan di promé ousilio. Tabatin mester di Rescuewagen pa funshonarionan di brantwer por a saka e viktima pegá den outo.