Na wes su pareser un multa lo tabata e mihó opshon enbes di kastigu di prizòn.

Nieuwe Haven— Den deklarashon di e akusado Wensley O. e la indiká ku e 70 gram ku e la importá pa Kòrsou ku tabata inkluí mariwana i hash tabata pa propio uzo. Segun e ku e no tabata sa ku na Kòrsou esaki tabata ilegal mirando ku na Hulanda esaki no ta un echo kastigabel.

E akusado no tabata tei presente ayera den sala, pero fiskal mr. V. Girigoria- Hernandez a pidi wes pa por a trata e kaso bou di ousensia di e akusado. Ta akusá Wensley O. ku dia 14 di Aprel di aña 2021 e lo a transportá 40 gram di mariwana i 30 gram di hash pa Kòrsou. Ta asina ku e akusado tabata den un buelo pa Kòrsou riba e fecha ariba menshoná for di aeropuerto di Schiphol. Na su yegada aki na Kòrsou na momentu ku su maleta mester a pasa dor di e “screening machine” a tuma nota di algu no usual den maleta di e akusado. Na momentu ku a bai hasi kòntròl den e maleta a tuma nota di un bleki di mangel lora den papel di selofan, den e bleki aki tabatin par di paki lora den papel di regalo.

Despues ku a kita e papel di regalo a tuma nota di 8 pakete lora ku tabata kontené supstansia maron. Despues ku a habri e pakinan aki esaki a saka holó fuerte unda ku mesora a pensa ku ta trata aki di droga. Despues di a manda esaki nan laboratorio i a risibí e resultado, tabatin indikashon ku ta trata aki di 40 gram di mariwana i 30 gram di hash.

Den deklarashon di e akusado e mes a aseptá di ta responsabel pa e droganan aki i a bisa ku e la kere ku esaki tabata legal mirando ku na Hulanda si esaki ta. E a indiká ku e la lubidá esaki kompletamente i ku e la bin ku nan Kòrsou pa propio uzo i no pa bende niun hende ni trese pa niun hende.

Segun fiskal ku e akusado mes a aseptá lokual ku e la hasi i kada un di e echonan por wòrdu konvinsentemente legal prueba. Segun e karchi di kastigu di e akusado e tabata den kontakto ku hustisia den pasado pero esaki no tabata pa transportashon di droga. Pues fiskal a hasi demanda di 90 dia di enkarselashon di kual 45 dia ta kondishonal ku tempu di prueba di 3 aña.

Wes mr. G. Verbeek a indiká ku segun e deklarashon di akusado ku e la transportá esaki nan pa propio uzo, di kual wes tambe ta kere ku lo por ta posibel mirando  e kantidat tiki ku e la transportá. Pero ku esaki no ta kita ku ta un echo kastigabel sino, paso transportashon di droga pa Kòrsou no ta legal. Na wes su pareser un kastigu di prizòn no ta esun adekuá pa e akusado sino un multa. Wes no a bai di akuerdo ku e demanda di fiskal i a duna e akusado un multa di 1000 florin i 90 dia di enkarselashon kompletamente kondishonal.