Ansary a inverti den Kirby. E kompania ta ópera un fleta di 250 toubot huntu kombiná
ku mas di 1.000 lancha riba laman i riunan na Estádos Unídos

Schottegat–  Tin un desaroyo bastante interesante ku ta tumando lugá na Kòrsou ku por resultá den efektonan riba balor den akshonnan di Ansary na Estádos Unídos. Entrante yüni próksimo, un konsorsio estado unidense lo ta e kandidato mas probabel pa logra haña derechi riba operashon na Refineria Isla.

Na e momentonan aki tin ekspertonan tékniko i finansiero na Kòrsou for di Estádos Unídos evaluando e referenshanan di operashon na Isla. Lokual ta bira interesante ta ku parti di e derivadonan petrolero prosesá na Kòrsou ta destiná pa merkado di konsumo na Estádos Unídos. Na momento e derivadonan yega na kosta di Estádos Unídos, mester di lancha pa subi e kanalnan i riwnan pa transportá. Hushang Ansary tin entre 8 pa 10% akshon den e kompania di transpòrt petrolero interno mas grandi di Estádos Unídos, Kirby Corporation.

E akshonnan di Hushang Ansary den Kirby Corporation a stabilisá na 72 dòler despues di un kaida fuerte durante Covid na mart 2020. Na medio 2017, den un akuerdo di kompra i benta, Hushang Ansary a transformá su akshonnan den Stewart & Stevenson den Kirby Corporation. E transakshonnan a tuma lugá algun luna promé ku Korte a imponé un Medida di Emergensha riba kuentanan di 5 kompania na Ennia Caribe Holding.. Parman International, ku Hushang Ansary komo e akshonista prinsipal, a laga transformá un suma di 282 mion dòler fo’i grupo Ennia Caribe, den forma di invershon den Kirby Corporation, un kompania ikono den transporte industrial marítimo na Houston Texas, Estádos Unídos.  Kirby Corporation ta kapitalisá na un balor di balor di 4 bion dòler estado unidense miéntras nan preis di akshon despues di Covid na mart 2020 a bin kai bendiendo na 48 dòler miéntras na yanüari 2020 su balor tabata na 90 dòler pa akshon. Te ku ayera, e balor tabata anotá na 73 dòler estado unidense.

E kompania ta bendiendo 1.7 bion dòler anual. Kirby ta e kompania di transporte marítimo di lancha,  mas grandi na Estádos Unídos. Kirby ta ópera un fleta di 250 toubot huntu kombiná ku mas di 1.000 lancha riba laman i riwnan na Estádos Unídos. Nan transporte marítimo ta konektá e popular riu di Mississippi ku restu di Estádos Unídos miéntras riba e Intercoastal for di e Golfo di Mexico ku ta konektá na Estado Unídos, Kirby ta e medio di transporte mas dominante pa,lokual ta trata tráfiko petrolero. Aparte di ta un lider riba riu di Mississippi, nan ta duna servisio industrial dor di bende ekipo i makinaria manera generator, motor, instalashon di energia nuklear industrial.