DEN HAAG—Gabinete a haña aprobashon di Komishon Oropeo pa duna sosten na kompanianan ku tin èkstra gastunan pa motibu di salida di Inglatera (Brexit).

E kompanianan ta konfrontá reglanan di duana mas stringente i mester hasi èkstra gastunan. Ku e aprobashon di sosten nan ta keda kompensá. Inglatera a sali for di Union Oropeo den 2020. Despues di un periodo di transishon di kasi un aña a bini reglanan nobo pa komersio internashonal. Pa e kompanianan hulandes ku tabata hasi hopi negoshi ku Inglatera, esaki tabata nifiká èkstra trabou i gastunan. E kompanianan ta haña supsidio di entre 10.000 i 40.000 euro, pasobra pa motibu di salida di Inglatera nan mester a adaptá nan sistemanan di IT. Pa kompanianan den haf i kompanianan di utilidat e suma por subi. Por usa e supsidio pa entrenamentunan i asistensia di konsheronan. Tin kondishonnan mara na e sosten. Asina e supsidio ta solamente pa kompanianan ku pa motibu di Brexit pa promé biaha ta hasi negoshi pafó di Union Oropeo. Tambe nan obligashonnan ku duana mester a bira realmente mas kompliká pa motibu di salida britaniko.