E aria di Lanthùis Hèl unda e tiramentu a tuma lugá.

Willemstad ——- Polis ta investigando un kaso di tiramentu na unda un bruder ku ta traha na CMC a keda  heridá pa bala na altura di su pechu.

Tabata djamars 7 di mart 2023 alrededor di 23.34’or, Sentral di Polis a risibí informashon di un kaso di tiramentu ku a tuma lugá den área di Lanthùis Hel. Un unidat polisial a keda dirigí na e sitio i na su yegada a bin enkontrá un hòmber ku herida di bala na e parti ariba di su kurpa na altura di su pechu. Mesora a pidi ambulans pa presentá na e sitio ku a transportá e víktima pa Sala di Emergensia di C.M.C. Kousa di e tiramentu te ainda no ta konosí i investigashon den e kaso aki ta kontinuá. Segun informashonnan disponé ku e víktima mes a sali bisa ku e tabata na e sitio ei kual ta un sitio alehá i den poko skuridat i na dado momento un tipo a aserk’é pa trata di kita su pertinenshanan for di dje. Dado momento a surgi un forsageo pa kita e telefon na unda e sospechoso mester a saka un arma i tira e víktima ku esaki pa despues kore bai. E víktima a kore bai skonde den e pida mondi na unda e la yama polis pa asistensia. E otro vershon ta ku e víktima tabata na e sitio alehá ei wardando un persona. Ora esaki a presentá kosnan a bin sali for di man unda a hasi uso di arma di kandela. Miéntras e víktima ta interná i ta for di peliger hañando e atenshon nesesario.