ARUBA—Djamars 18 di aprel e barku di Marina, Zr.Ms. Holland, ku na e momentunan aki ta nabegá pa Wardakosta Caribe Hulandes, a detektá un go-fast.

 E dos botonan di interseptashon rápido ku na bordo e tim di Eskuadron Hulandes (Fleet Marine) di Zr.Ms. Holland a keda lansa pa stòp e boto sospechoso. Una bes ku nan a yega serka banda di e boto a duna nan señal pa stòp y e sospechosonan a entrega nan mes. E sospechosonan a benta un parti di e kontrabanda den lama. E paketenan aki despues a keda saka for di den lama pa un di e botonan di interseptashon rápido. E peso kompleto di e paketenan a yega na mas o ménos 850 kilo di kokaina. Zr.Ms. Holland a entrega e tres sospechosonan y e droga na Wardakosta kual a entrega e personanan y droga na Kuerpo Polisial di Aruba. Entretantu e droga a keda destruí.