Willemstad, — Gerensia di Curaçao Medical Center (CMC) i Ministerio di GMN ta diferensiá di opinion ya pa algun tempu tokante di e haltura di e presupuesto di kuido médiko di CMC na benefisio di aseguradonan konforme Ordenansa Nashonal di Seguro Básiko (BVZ). Na 2021, CMC a hiba gobièrnu korte.
CMC a eksigí pa hala den tur e pòstnan di korekshon, di mas o ménos 20 mion florin (NAf) pa aña (un total 40 mion), ku Ministerio di GMN a implementá den e presupuesto di kuido médiko. Ademas, CMC a eksigí kompensashon pa e gastunan di transishon i inisiashon di kasi 40 mion florin. 11 di mei 2022, Korte di promé instansia a duna un sentensia, siguí pa un sentensia 26 di yüli 2023, di Korte di Hustisia Komún.
Despues di e sentensia di Korte di Hustisia Komún di 26 di yüli último, Ministerio di GMN a oumentá e presupuesto di kuido médiko di CMC na benefisio di pashèntnan di BVZ pa e periodo entre 15 di novèmber 2019 (apertura di CMC), te ku 31 di desèmber 2021, ku forsa retroaktivo, pa medio di dos disposishon di presupuesto (budgetbeschikkingen) separá, di e siguiente manera:
Oumento di presupuesto di kuido médiko di BVZ di CMC | |||
Periodo | Presupuesto di kuido médiko di BVZ original | Oumento presupuesto di kuido médiko di BVZ | Presupuesto di kuido médiko di BVZ |
15 novèmber 2019 – 31 desèmber 2020 (13.5 luna) | NAf 206.482.214 | NAf 2.733.125 | NAf 209.215.339 |
1 yanüari 2021 – 31 desèmber 2021 | NAf 184.500.000 | NAf 5.525.000 | NAf 190.025.000 |
Ademas di e oumento di presupuesto di kuido médiko di BVZ di CMC, Ministerio di GMN a otorgá tambe e siguiente montantenan pa akreditashon di CMC:
Gastunan di akreditashon di CMC | |
Periodo | |
15 novèmber 2019 – 31 desèmber 2020 | NAf 240.223 |
1 yanüari 2021 – 31 desèmber 2021 | NAf 856.199 |
Ademas di e adaptashon di e presupuesto di kuido médiko di BVZ i e kompensashon di e gastunan di akreditashon, CMC i Ministerio di GMN mester yega na un akuerdo separá pa kompensashon di e gastunan di transishon i inisiashon di CMC durante e periodo di 2014 pa 2022, ku ta kalkulá na kasi 40 mion florin.
Den pasado, gerensia di CMC i e diferente ministernan di GMN a negoshá finansiamentu di e gastunan di kuido di no aseguradonan. E gastunan aki a subi den transkurso di e añanan 2019 te ku 2022 na 19.5 mion florin. Pa kompensá e gastunan aki pa e añanan 2019-2022, a firma un akuerdo 15 di mart 2023 entre CMC i Ministerio di GMN, pafó di e proseso legal i sentensia di korte. E kantidat di 19.6 mion florin a wòrdu pagá den transhenan adelantá entretantu na 2023.
Ku e disposishonnan di presupuesto aki, ta tuma un paso mas pa garantisá un kuido di kalidat i aksesibel pa tur habitante di Kòrsou. Esaki ta enfatisá e meta di tantu CMC komo Ministerio di GMN pa fortalesé kuido médiko ainda mas na Kòrsou. Tur dos partido ta komprometé pa garantisá e mihó kuido posibel pa nos komunidat. Bienestar di e pashènt ta primordial.