Willemstad, — Ministerio di SOAW a presupuestá 50 mil den aña 2024 pa kombatí prostitushon bou di hubentut.

Den kuadro di yudansa sosial den barionan a presupuestá 50 mil pa kada aña di 2024, 2025, 2026, i 2027 pa kombatí prostitushon bou di e hubentut. Lo organisá un reunion di eksperto pa asina krea konsientisashon tokante prostitushon bou di hubentut.  E plan pa kombatí ku prostitushon tambe ta kai bou di e plan pa mehorá desaroyo den barionan di Kòrsou. E plan di desaroyo den bario lo wòrdu ehekutá ku diferente ministerio, stakeholders, i organisashonnan no-gubernamental.

Tambe lo bai apliká un ‘Kódigo di Protekshon’, un método ku ta konsistí di 5 paso, ku lo wòrdu uzá dor di gruponan profeshonal pa tuma akshon manera ta rekerí den kaso di sospecho di abuzu di mucha òf violensha den bario. Den kaso di sospecho di abuzu di mucha òf violensha den bario, kada profeshonal ta dispuesto pa pone e pasonan di ‘Kódigo di Protekshon’ den práktika, tuma un desishon adekuá pa ofresé yudansa i/òf reportá abuzu.

Implementashon di Kódigo di Protekshon ta un di e prioridatnan mas haltu di minister di SOAW pa asina kombatí abuzu di mucha i violensha na Kòrsou. Bou di e ‘Kódigo di Protekshon’, lo prepará un plan di komunikashon por medio di un kampaña informativo na nivel nashonal. 

Por medio di e kampaña aki siudadanonan lo ta mas informá. Implementashon i ehekushon di e ‘Kódigo di Protekshon’ aki lo wòrdu hasí promé ku 2024.