Direktor di ABC Busbedrijf, John Cijntje a duna splikashon amplio tokante e meta di e reunion ku parlamento ayera den oranan di mainta.

Buena Vista,– Ayera miembronan di parlamento di Kòrsou a bishitá ofisina di ABC Busbedrijf pa asina deliberá tokante diferente punto di atenshon di e kompania.

For di den oranan di mainta vários miembro di parlamento a presentá na ABC Busbedrijf pa asina reuní ku gerensia di e kompania. Durante e reunion ayera, direktor di ABC Busbedrijf, John Cijntje a splika ku entre otro kiko e vishon di e kompania ta i kon esaki a bin kambia atraves di tempu.  Segun John Cijntje, ántes e vishon i mishon di ABC tabata solamente pa manehá i kore konvoinan, pero awendia e statüt a wòrdu adaptá kaminda ABC Busbedrijf por hèndel tur tipo di transporta bou di nan maneho. Basá riba e punto di bista moderno ABC Busbedrijf su ròl ta mas pa kordiná transportashon ku diferente partidonan den transport.

Cijntje a sigui splika ku ta imposibel ku otro kompania ku ta traha den transporte públiko, no ta duna un servisio regular na pueblo. Pa stòp ku e práktika aki, ABC Busbedrijf ta para pa kordinashon entre e konvoi i e bùsnan chikitu.  Aktualmente ABC Busbedrijf tin un konsepto riba mesa kaminda bùsnan chikí ta keda kore solamente na Banda Abou i ABC Bùsbedrijf ta keda move entre Barber i Otrobanda. Segun e gerensia, un konsepto nobo aki lo sòru ku konvoi lo por kore di Bandabou pa Otrobanda kada 45 minüt lugá di kada 2 ora manera e ta aktualmente.

Otro proyekto ku ABC Busbedrijf ta trahando ariba ta un konsepto pa brinda servisio di transporte pa personanan den ròlstul. Cijntje a splika ku aktualmente tin mas o ménos 8 mil persona den ròlstul i ta un reto formal pa e personanan aki sali for di kas. Segun Cijntje, komo un kompania di transporte públiko, ABC Buesbedrijf mester brinda servisio na e grupo aki tambe. E direktor di ABC no a bai muchu den detaye tokante e proyekto aki, pero Cijntje a splika ku e grupo aki lo wòrdu transportá basá riba un abono mensual. E persona den ròlstul ta traha su sita i ABC lo bah’é unda ku e mester ta.

Despues di e reunion por nota tambe ku ABC Busbedrijf ta para pa unifikashon, organisashon i kalidat.