Zita Jesus Leito ta mira ku por tin un bon kolaborashon entre ABC i e bùsnan chikí pa yega na un servisio muchu mas mihó pa pueblo.

Buena Vista, — Miembro di parlamento Zita Jesus-Leito tabata tei presente huntu otro parlamentarionan na e reunion ku ABC bùsbedrijf. Ta asina ku parlamentario Zita a splika ku mester kolaborá ku ABC bùsbedrijf pa asina por yega na un mihó servisio pa nos habitantenan.

Zita Jesus Leito a menshoná ku komo èks minister di VVRP a bringa hopi pa ABC por haña sufisiente supsidio. Segun Zita, awendia bo ta mira ku tin sèn di sobra i ku minister di finansa ta dunando supsidio tur sorto di kaminda. Tambe Jesus-Leito a ta menshoná den un entrevista ku Vigilante, ku ABC busbedrijf  ta un organisashon ku ta manehá su finansa nan bon, pero ta mira si ku mester di mas kapital pa kumpra mas bùs.  Segun Zita esaki no ta algu fásil pa hasi. Tambe ta menshoná ku durante ku Zita tabata minister a hasi tur posibel pa drecha sektor di transporte. Zita ta mira ku por tin un bon kolaborashon entre ABC i e bùsnan chikitu pa yega na un servisio muchu mas mihó.

Kolaborashon entre ABC bùsbedrijf i e bùsnan chikitu ta pone ku servisio lo ta pagabel, por yega tur kaminda, i por disidí tambe pa laga outo un banda pa kore ku transporte públiko. Por ehèmpel na Hulanda, konseheronan i ministernan mes ta hasi uzo di transporte públiko debí na e aksesibilidat. Pero Zita ta menshoná ku mester di kolaborashon pa logra restrukturá transporte públiko.. 

Por último Zita ta menshoná ku e reto di mas grandi ta e kambio di leinan di tráfiko i prinsipal den e parti di sektor di transporte públiko. Tambe tin un sistema di pèrmit ku ta vigente na e momentunan aki ku ta pone ku no por duna un pèrmit fásil na hendenan yòng ku ke hasi sierto kambio den e sektor. Tin tambe desaroyonan mundial ku ta tumando lugá manera por ehèmpel ‘Uber’, kual ta un kompania di transportashon ku tin un aplikashon ku ta permití pasahero yama shofùrnan independiente, kual tambe por wòrdu usá komo posibilidat, segun parlamentario Jesus-Leito.