Willemstad – Riba e promé dia di e konferensia “Invest in Willemstad”, Minister Cooper a desvelá un plachi ku un kódigo QR riba e fachada di edifisio di Fundashon Monumentenzorg, esta Villa Maria. E kódigo QR riba e plachi aki ta yama atenshon pa informashon interesante tokante e edifisio i su deskripshon ofisial di monumento riba e página wep www.curacaomonuments.org.

Tambe representantenan di N.V. “Stadsherstel” i Kura Hulanda Village a risibí un plachi simbóliko. Nan ta forma parti, huntu ku Fundashon Monumentenzorg i Ministerio di VVRP, di un proyekto piloto. Di e mesun forma, Fort Amsterdam i edifisionan di gobernashon na Wilhelminaplein tambe lo haña un plachi ku kódigo QR.

Meta di e proyekto aki ta pa hasi informashon tokante herensia tokante konstrukshon di Willemstad disponibel ‘den tempu real’ pa interesadonan. Hende ku ta kana den nos sentro di siudat i ta wak un edifisio interesante, por skèn e kódigo QR fásilmente pa mas informashon tokante e edifisio. Esakinan por ta studiante, hendenan ku ta kumpra, turista òf otro interesadonan. Nan lo haña un resúmen kòrtiku di e historia di e edifisio, i  e deskripshon ofisial di monumento huntu ku potrètnan adishonal.

Den e sentro di e siudat tin 734 monumento registrá. Pa kada un di e edifisionan aki, aktualmente e deskripshon ofisial di monumento ta disponibel riba e “website”. Esaki ta un teksto bastante tékniko ku ta deskribí aspektonan di konstrukshon di e edifisio. Na e inisio di e proyekto aki, pa 75 monumento ta agregá informashon kultural históriko adishonal tokante e edifisio riba e página wep, i kaminda ta posibel, potrètnan i dokumentunan adishonal. Esakinan ta lokalisá den e áreanan di ‘Stegengebied’ i Kura Hulanda den Otrobanda, Scharloo Abou / Fleur de Marie, i den Punda rònt di Fortplein i Wilhelminaplein.

Despues di e fase piloto aki, e ekipo lo kontinuá ku e tarea pa proveé mas edifisionan monumental den Willemstad ku un plachi ku kódigo QR i informashon adishonal riba e página wep . “Pietermaai belangenvereniging” a mustra interes i  DMO tambe. E intenshon ta ku e doñonan di monumento mes paga e gastunan pa teksto i plachi, manera a sosodé durante e fase piloto. Por posiblemente buska spònser pa esaki. E proyekto aki ta un inisiativa di: “Monumentenplatform Curaçao”. Maneho di proyekto ta den man di Stichting Monumentenzorg Curaçao i Ministerio V.V.R.P.