Willemstad—Djaweps 31 di ougùstùs 2023, minister di Salubridat, Medio Ambiente i Naturalesa, den presensia di e gerensia i personal di Advent Hòspital, a emití seis dekreto ministerial nobo pa remplasá e dekretonan mas bieu ku ya tabata eksistí, ku ta duna e instituto e espasio pa funshoná muchu mas mihó komo hòspital. Den palabranan di e direktor, Advent por hala rosea atrobe.

Den e añanan promé ku a konstruí un hòspital nobo, gobièrnu tabatin intenshon di yega na un organisashon di hòspital grandi, entre otro dor di uni Advent Hòspital i e Klínika Taams di e tempu ei. Asina, e fushon aki semper a keda inkluí komo kondishon den e pèrmitnan pa diferente funshonnan emití na Advent. E pèrmitnan aki tabata referí, entre otro, na e reïnisiashon di klínika Taams, e sentro di soño, e sentro di diálisis, e sentro di diagnóstiko pa MRI, e kuido médiko medio i un sentro di prek, kumprá pa Advent Hòspital.

Advent Hòspital ta parti di un organisashon internashonal grandi di hòspitalnan atventista. Asina, un fushon ku otro hòspitalnan no tabata sostenibel. Advent, pa definishon, no por a kumpli ku e kondishonnan ku tabata inkluí den e pèrmit e tempu ei. Ademas, a resultá ku e kondishonnan aki a stroba kontinuashon di desaroyo di Advent, komo un suich importante den kuido di hòspital na Kòrsou. P’esei tabata nesesario pa regla un kantidat di dekretonan ministerial importante di akuerdo.

Asina, direktor di Advent, sra. Panneflek, a ekpresá su satisfakshon pa e maneho i abilidat di desishon di e minister di Salubridat, Medio Ambiente i Naturalesa, pa duna Advent e espasio pa desaroyá i kibra e kadena ku Advent a ser strangulá kuné pa años.

E kondishon ku Advent mester drenta den fushon ku e organisashon sentral di hòspital planiá rònt di 2015 ta for di mesa.

Algun aña pasá, Advent Hòspital tambe a wòrdu designá komo e klínika di kuido di wowo. Na e momentonan aki tin lista largu di pashèntnan ku ta warda tratamentu di wowo i/òf operashon.

Pa trata e listanan di espera aki, Ministerio di Salubridat, Medio Ambiente i Naturalesa i Inspektor di Salú Públiko a sigurá ku Advent a risibí e pèrmitnan pa atraé kuater dòkter di wowo for di eksterior. E dòkternan di wowo aki lo kuminsá na òktober na Advent.

Resientemente, Advent Hòspital a risibí un surplus di likides pa garantisá i mehorá kuido. Asina, ta hasiendo awor invershon den e ekiponan nesesario pa por hasi tratamentu i operashonnan di wowo.

Ministerio di Salubridat, Medio Ambiente i Naturalesa ta sostené Advent tambe dor di hasi operashonal atrobe un kantidat di sala di operashon ku ta den reparashon.

Advent hòspital ta hopi agradesido pa e konfiansa ku komunidat semper a duna i ta spera un era kaminda ta kontribuí aktivamente na redusí e listanan di espera i oumentá kuido  sostenibel pa su pashèntnan.