WILLEMSTAD – Na final di ougùstùs gerensia di ACU a diskulpá su mes ku sosionan, ya ku no por a kumpli ku pago di dividènt den luna di ougùstùs, manera palabrá den e último Reunion General.

Gerensia a anunsiá ademas di ta pendiente di e aprobashon final i lo a hasi tur posibel p’e pago por tuma lugá pa mas tardá medio sèptèmber 2023. Esaki a lanta basta diskushon den medionan di komunikashon (sosial), asta bou di hende ku no ta ni miembro di ACU i porlotantu lo no risibí niun pago di dividènt. Minister di Finansa Javier Silvania ku ta hopi aktivo riba su página sosial i porlotantu hopi aksesibel pa pueblo, tambe a risibí preguntanan di algun persona tokante e pago. E mester a splika tur hende ku e no ta enkargá ku pago di dividènt. Gerensia a bolbe saka un komunikado pa sosionan ayera, splikando e status dje pago.

“Manera nos a indiká den nos komunikado anterior, nos tabata konfrontá nos mes den e fase di e prosedura, kaminda Banko Sentral mester a duna su aprobashon pa ACU por bai over na repartishon di sùrplùs. Lamentablemente e parti akí no a finalisá ainda. Por lo tanto ACU no por a kumpli ku e promesa di repartí e sùrplùs te ku awó. Nos ta spera di por risibí un reakshon di Banko Sentral pronto i lo tene bo debidamente informá di e desaroyonan. Nos sinsero diskulpa pa kualkier inkumbiniensia kousá.” Asina e gerensia a informá tur sosio ayera den un komunikado kòrtiku.