WILLEMSTAD – Minister Charles Cooper di Tráfiko, Transporte i Planifikashon Urbano lo ta dia 21 di novèmber den Parlamento, pa kontestá e preguntanan hasí den promé tanda dje reunion den Komishon Sentral tokante restrukturashon di transporte públiko dia 15 di sèptèmber último.

Ta resientemente Ana Maria Pauletta di PAR a rekordá Presidente di Parlamento Charetti America-Francisca riba e kompromiso di Minister Cooper pa ku e reunion. Cooper a pidi 3 siman pa prepará su kontestanan. Pauletta den su karta rekordatorio na e Presidente: “Durante e 6 siman ku a pasa, Parlamento a bishitá e kompania ABC i tambe miembronan di Parlamento a risibí un dokumento for di man di e direktor di kompania sr. Cijntje, ku puntonan di atenshon pa ku e kompania. Algun di e puntonan ta trata aspektonan finansiero di ABC Busbedrijf.” E Parlamentario ta sigui rekordá ku transporte públiko manera Parlamento a aprobá esaki den moshon di aña 2020 ta den krísis. Pauletta tabata ke pa yama e reunion di ABC, promé ku Parlamento mester aprobá e Presupuesto 2024.

Manera Vigilante a para ketu na dje anteriormente, transporte públiko ta un tópiko di dia na Kòrsou pa hopi dékada kaba. E diskushonnan rondó di transporte spesial pa personanan desabilitá tambe a oumentá durante último añanan. Minister Cooper a risibí masha hopi pregunta durante e reunion di skòrs. A reuní e dia ei riba petishon di frakshon di PAR di dia 7 di yüni último. Frakshon di PAR ke sa di Minister Cooper kon leu ta ku e plannan pa kambia e sistema di transporte públiko i tambe eventual kambionan ku a bini den e plannan eksistente. Pauletta a pidi Cooper promé ku a habri e promé tanda di pregunta, pa algun dokumento di ABC Busbedrijf. Cooper a splika ku e kuentanan anual di 2020 te ku awó no ta disponibel pa motibu dje situashon finansiero dje kompania. El a keda di manda esun di 2019 pa Parlamento. Tambe e lo a entregá e rapòrt di Stichting Belasting Accountants Bureu ku Pauletta a pidi. E no a hasi esaki ainda.

Meskos ku PAR, frakshon di MFK mes tambe ta hopi preokupá pa aksesibilidat pa tur hende, spesialmente esnan desabilitá, na transporte públiko. Fergino Brownbill a mustra riba e echo ku ta for di 2012 Parlamento ta reuní tokante e tópiko akí, sin ku muchu a kambia. Na yüni 2012 pa promé biaha despues ku a desmantelá Antia, Parlamento di Kòrsou a sinta ku ABC i a kuminsá papia tokante desaroyo di e kompania su servisio. El a rekordá ku na 2014 a pasa un moshon enfoká riba e aspektonan pa yega na un transporte públiko interkonektá, aksesibel, i pagabel for di Oostpunt te ku Westpunt. El a lamentá ku awe den 2023 no ta muchu kos a kambia.