Falsu: a firma pa ehekushon Konferensha di Reino sin ta kumpliendo.

Daniel—E akuerdo di gobernashon, entre MFK i PNP, no ta kumpliendo ku parti di nan kontenido. Esaki sigur pa lokual ta trata Konferensha di Reino. Segun e akuerdo firmá na Lanthùis Daniel, e gobièrnu di MFK i PNP lo re-introdusí Konferensha di Reino.

Entretantu si ku nan mes ta konsiente, aktual kabinete di Pisas ta ehekutando COHO a pia de la letra via di Pakete di Pais. Awor ku COHO pa 95% ta definitivo, Konferensha di Reino ta un èrmènt importante pa mantené e proseso di evaluashon i midimentu di efektividat pa COHO. For di 2014, Gobièrnu di Kòrsou i demas gobièrnunan den Reino no a sigui organisá e konferenshanan programá pa evaluá e Leinan di Konsenso den práktika.

Den pasado ningun di e Konferenshanan organisá a duna resultado. Tabata na 2010, despues di e firmamentu na Den Haag pa realisá e “Kòrsou Outónomo” ku e promé Konferensha di Reino a tuma lugá na 2011. Einan a opta pa instalá gruponan di trabou ku lo mester a atendé diferente aspekto i desaroyo den e Reino di “polish”. Asina por ehèmpel a bini gruponan di trabou pa establesé entre otro 1. Mihó Koperashon den Reino 2. Atendé Puntonan di Konflikto 3 Tráfiko Liber den Reino i finalmente 4. Adaptashon di e.o. Areglo di Disputa i demas aspektonan kual ta regardá demokrasia.

Segun e Akuerdo di Gobernashon entre MFK i Partido Nashonal PNP, ta bai trese bek e Konferensha di Reino anual. E Konferensha di Reino tabata un plataforma bou di kual Hulanda i islanan Aruba Kòrsou i St. Maarten lo a dialogá anualmente riba e Leinan di Konsenso. Al final, debí na falta di interes, no a sigui ku nan.

E promé Konferensha di Reino a start na 2011 ku masha hopi promesa sin nunka mas a regresá. Ni na 2012. Na 2013 a opta pa kambia e palabra “konferensha” pa Konsulta den Reino kual a tuma lugá na Aruba sin muchu èksito. Despues di esei tabatin dos konferensha mas, unu na Aruba i un último na Kòrsou, kual pa “negligensha” no a ni pone Leinan di Konsenso riba agènda. Te ku dia di awe, ningun di e konferenshanan di reino a duna resultado.  Segun e aktual Akuerdo di Gobernashon,  Kòrsou komo pais outónomo den Reino lo ke estrechá su lasonan di relashon ku kada pais miembro di  Reino. E intenshon no ta pa saka man i pidi ayudo pa kada nesesidat òf situashon ku presentá. Sinembargo, lo hasi lo máksimo pa por solushoná tur e nesesidatnan ku presentá i buska ayudo kaminda ta nesesario pa por kumpli ku esakinan. Den e kuadro aki lo buska e manera adekuá i traha konhuntamente ku paisnan den Reino riba diferente área i terenonan, ku e meta pa krea benefisionan pa  siudadanonan di pais Kòrsou. Pa por logra esaki lo pone atenshon riba entre otro Konferensha di Reino.

Partidonan MFK i PNP a primintí pa re- instituí e konferenshanan anual di Reino. E Leinan di Konsenso implementá na 2010, nunka no a kondekorá e parti humano durante nan ehekushon. Pa tal motibu, ningun di e 5 leinan no a logra drecha ni e maneho finansiero pero tampoko e maneho hudisial na Kòrsou. Falta di organisashon rondó di Maneho Finansiero, por ta unu dje faktornan ku Kòrsou no por kumpli ku eksigensha nan imponé pa e Lei di Konsenso pa Supervishon Finansiero.  Diseño di e Leinan di Konsenso, tantu esnan hudisial komo finansiero a kuminsá for di 2007. Despues di 3 aña di planifikashon, na yüli 2010 nan a keda ofisialisá komo leinan den Reino. Durante planifikashon di e leinan i nan ehekushon, nunka niun eksperto no a pensa riba “implementashon”. E intenshon tabata pa e Konferensha di Reino tur aña atendé e problemanan di ehekushon. Un biaha mas, e biaha aki MFK i PNP a defroudá den ehekushon di e konferensha.