Otrobanda,– Den un komunikado publiká dor di Curacao Ports Authority(CPA), e organisashon ta duna di konosé ku un di e barkunan mas grandi na mundu a bishitá Kòrsou pa promé biaha ayera.

Ayera mainta e barku krusero di Royal Caribbean, Allure of the Seas, ku ta di 225.282 BRT, 1187 pia largu i 215 pia hanchu, a hasi su maiden call den haf di Willemstad, Kòrsou. E barku krusero ku tin 18 dèk ku un kapasidat total di 6780 wéspet i 2200 tripulante, a yega Kòrsou ku 4504 pasahero krusero i 1974 miembro di tripulashon na bordo i a mara na Mega pir Tula. Na 2017 a konstruí Mega pir Tula pa barkunan mas  grandi asina mara n’e.

E plan ta pa Allure of the Seas bishitá Kòrsou 13 biaha for di 5 di mei i despues mas òf ménos kada un siman pasa. Allure of the Seas a sali for di Port Everglades riba 30 di aprel, a pasa na Labadee, Haïti, Aruba i Kòrsou i lo regresá Port Everglades dia 8 di mei. Djis un ratu despues di Allure of the Seas, e barku Carnival Horizon a mara na Mega pir Ernst Jackie Voges ku 3909 pasahero krusero i 1362 tripulante na bordo. Esaki a reflehá ayera un total di 8413 turista den haf di Kòrsou.