Back to Top
Responsive image
E korant di pueblo

AMAK ta manda di dos karta pa minister Gilmar Pisas


September 14, 2021 • 3 minüt pa lesa

WILLEMSTAD,—-Ayera tabata nèt 1 siman ku presidente di A.M.A.K., señor Manfred “Feko”Gomes, a manda un karta pa Minister Presidente señor Gilmar Pisas. Kontenido di e karta tabata rondó di loke ku a pasa dos siman pasá na un hotèl parti pariba di brùg.

Miéntras tantu ayera Vigilante Farándula a haña otro karta ku presidente di A.M.A.K., a manda pa Minister presidente Gilmar Pisas. Esaki ta e karta ku a keda mandá ayera pa minister Gilmar Pisas.

“Na Promé Minister di Kòrsou i alabes Minister di Hustisia Sr. Gilmar Pisas Presente.

Tópiko: No por keda mantené aktividat farandulero limitá

Muy distinguido Minister Pisas;

Direktiva di AMAK (Asosiashon di Músiko i Artista di Kòrsou) ta aserká bo persona preokupá pa e direkshon ku tur e medidanan pronunsiá pa bo gabinete ta hibando nos miembronan. Ya nos tin 4 siman ku fiestanan no por tuma lugá i ku músikonan ta sufriendo bou di esaki. Miéntras ku por mira klaramente ku e kantidat di kontagionan no ta bahando. Alkontrario, ta mirando ku tur dia di nobo un gran kantidat di hende ta bini aserka sufriendo di Covid-19, siendo ku a pidi pa keda kas i baha e kontagio.

“Direktiva di AMAK hasiendo un análisis preliminar den e asuntu aki, a bin saka afó ku e kontagionan ku ta plamando na Kòrsou sigur no ta bini di fiestanan kaminda yunan di Kòrsou ta bai o kaminda nos miembronan ta toka.

Nos pregunta na boso ta ku si boso si por a hasi un análisis i saka afó unda na Kòrsou tin un foko di kontagio riba nos Isla? Lo ta interesante pa kolektividat sa esaki. Banda di esaki nos mester bisa ku tempu ku farándula a habri, nunka a bin bisa o haña un kantidat di hende ku ta bishitando fiestanan lokal komo e sitio kaminda nan a keda kontagiá.

Di otro banda, ta un realidat ku Covid-19 a yega nos pais i no tin indikashon ku e ta bai por lo pronto. Esei ta pone ku básikamente nos tur mester kuminsá siña biba kuné, den e sentido ku e momentu a yega pa gobièrnu konvensé esnan ku no a bai bakuná ainda pa nan hasi esaki, pero mas ku tur kos, habri merkado kaminda bida di tur dia normal por sigui, pero manteniendo e reglanan di higiena pa asina ei evitá ku esaki ta sigui plama”.

“Den vários pais na mundu, pero sigur na Ulanda algun dia pasá por a tuma nota di un kareda di outo importante ku a tuma lugá, kaminda tabata tin míles i míles di espektador presente. Nan a hasi esaki di tal forma ku sea bo ta presentá bo karchi di bakuna o un prueba di 72 promé ku bo a hasi tèst. Di e forma aki bida por sigui drei normal riba nos Isla sin ningun problema.

Pero si sigui ku e medidanan pronunsiá pa bo persona komo Opperbevelhebber, esei ta nifiká morto sigur di farándula i di tur kos ku ta drei rondó di farándula. Direktiva di AMAK ta deseá si por pa e siman aki nos haña un reunion urgente ku bo persona tantu komo Promé Minister i Minister di Hustisia, pero tambe ku Minister di Kultura, pa asina ei nos deliberá riba e puntonan aki i mira kon lo por habri farándula bèk den e forma nobo. Sperando riba un kontesta positivo nos ta keda”.

T’asina ku Vigilante Farándula a haña di komprendé,for di ‘Feko’ Gomes, ku te ainda e no a haña kontesta riba e karta ku el a manda for di siman pasá djaluna pa Minister Presidente Gilmar Pisas. Awor ta di ban spera ku A.M.A.K., lo bai risibí kontesta riba e di dos karta ku nan a manda pa Minister Presidente di pais Kòrsou.

Login