Dos Santos ta splika ku ora ku yega ora pa e florin karibense bini, e euro ta bai dominá e florin karibense.

WILLEMSTAD,– E komersiante i eks lider di e partido Kòrsou di Nos Tur, Amparo dos Santos ta bisa ku el a tende diferente hende ta papia i tambe VBC a papia, pero hopi di nan no ta komprondé e asuntu di moneda karibense. E ta bisa ku VBC a sali papia, pero nan mester komprondé e kosnan, ora ta bisa ku Aruba tin su mes florin, mester kòrda bisa tambe ku Aruba tin su propio banko sentral tambe.

E ta bisa ku nan ta blo papia loke ta sirbi sierto gruponan di interes i tambe e ta bisa ku Boneiru ta dòler, nan no ta euro, paso e dòler ta stabil.

Amparo ta splika ku Sint Maarten tambe ta dòler, pues si bo kier bo propio moneda, bo mester tin bo tambe propio banko sentral.

E ta splika ku ora ku Kòrsou mester di dòler ta na Sint Maarten nan ta busk’é. Dòler ta e moneda di mas importante. Ora ku yega ora pa e florin karibense bini, e euro ta bai dominá e florin karibense. E ta bisa ku ta esaki ta lokual  hulandesnan kier hasi.

Na momentu ku tin e florin karibense nos ta bai paga 2 florin pa un dòler. Amparo ta splika ku mester tene kuenta ku pa e kambio pa Florin karibense, ta hopi plaka ta bai wòrdu inbertí i mester tene kuidou ku korupshon. E ta bisa ku pueblo mester rechasá e plaka aki paso e ta bai bira un desaster pa komunidat.