Purba: na diferente okashon, Ansary a trata na konbensé Jose Jardim riba e balor di Mullet Bay.

Nieuwe Haven—Grupo Ansary a start e proseso pa balotashon di Mullte Bay. Esaki ta lokual sr. Ralph Palm a duna di konose ayera na Vigilante sin kier a bai den muchu detaye ayera” Nos ta bezig”, e la duna di konose. Mas detaye e no tabata por a duna.

Manera ta konosi, e Tribunal di Tres wes a duna orden pa partidonan yega na un balotashon di Mullet Bay, pa Korte di Hustisia por averigua si un suma di kasi 700 mion florin di sakeo for di Ennia ta responsabilisa. For di 2002 te ku 2021, tabatin por lo ménos 13 kalkulo riba e balor di Mullet Bay. Mullet Bay ta balorá aktualmente segun Parman International na 770 mion florin miéntras segun Banko Sentral, e balor di Mullet Bay no ta surpasá 90 mion florin. Un diskrepansha enorme entre e dos partidonan. E balor ta importante, pasobra esaki ta anotá komo aktivo serka EC Investment, kende a uza entre otro e balor aktivá di Mullet Bay pa por responsabilisá invershon via di Ennia Caribe Leven pa bolsa internashonal di balor. Den bukinan di Ennia, ta papiando di 770 mion florin.   Pues 770 mion florin a sirbi ku un tipo di “collateral” pa EC Investment por a uza sèn di Ennia Caribe manda pa Parman International B.V. por a uza riba bolsa di balor estado unidense.  770 mion kita 90 mion ta un diferensha grandi di 680 mion florin. Segun Parman International , nan ta asombrá ku awor Banko Sentral ta kuestioná e balor di Mullet Bay, miéntras Banko Sentral mes a permití Ennia Caribe kobra dividendo basá riba e preisnan di tereno relatá na 770 mion florin.

For di un memo di KPMG, kontroladó di Ennia na inisio di 2009, tin stipulá eks direktor Abdallah Andraous  a súplika na e kompania di balotashon pa uza mil dòler pa meter kuadra komo meta pa yega na un balor di Mullet Bay. E memo ta bisa lo siguiente: “He (e kompania ku mester a balotá), told PWC that Abdallah asked him to value the land for U$ 1.000 per m2”. Esaki lo a pone e balor di Mullet Bay yega kasi 700 mion dòler estado unidense. Aparte di Abdallah Andraous, tabatin diferente otro eks direktornan na Ennia a trata na mantené e balor di Mullet Bay haltu, asina krea balor di lokual Sun Resorts, komo doño di Mullet Bay tabatin den Ennia Caribe. Segun Banko Sentral e preis aki ta apsurdo. Kámara di Akountent na Zwolle tambe a a konkluí ku dos akountentnan kende a sera bukinan di Ennia, no a duna sufisiente oposishon kontra di e balor di via di Mullet. Kámara di Akountent ta konkluí ku e dos akountentnan a faya seriamente den atendé e problemátika di balorisashon miéntras esaki a okashoná un debe latente di impuesto ku tampoko a keda apuntá.

Segun abogadonan di grupo Ansary, un transferensha riba balans ehekutá bou di órden di Banko Sentral ta afirmá e balor kalkulá di Mullet Bay na 700 mion florin. Esaki ta lokual abogado Mirto Murray a duna di konosé  djamars den sala di korte.Segun Murray, e tereno di Mullet Bay ta pertenesé na SunResorts Ltd (‘SunResorts’). E akshonnan di e empresa aki ta inkorporá den e grupo aliadonan di Banko di Caribe komo kapital propio na 2005. Despues di esaki, riba insistensia di CBCS, tur kos a mester a kambia i akshonnan di SunResorts mester a bai bou di ECI. Na e momentu  ei, ECI no tabatin plaka pa paga e akshonnan. CBCS/BNA a sugerí pa ECL (leven) paga NAf 300 mion i pa esaki e promé préstamo “intercompany” a ser kreá. Na 2019, CBCS a laga a akordá un korekshon riba balans ku CBCS a implantá dor di medio di repartishon di dividendo na forma di transferensia di parti di e tereno di Mullet Bay ku ainda tabata bou di un empresa diferente, Resorts. Ta improbabel ku e mesun akountent ta bai for di un balorashon supuestamente falsu, miéntras ku e ta aprobá e mesun balorashon despues di e rapòrt di balorashon ku a ser produsí bou di órden di CBCS na2019. E preis ku e mesun akountent a balora ta igual na e preis ku grupo Ansary a menshona di Mullet Bay.

Un kondominio na The Fourteen di 100 meter kuadra ta wòrdu bendí pa 1.1 mion florin (550 mil dòler).  Esaki ta igual na 10 mil florin (nafl. 10.000,=) pa meter kuadra di konstrukshon. Si apliká un regla komun unda por derivá e relashon entre meter kuadrá konstruí na balor di tereno, Mullet Bay en bèrdat por tin un preis na merkado di por lo ménos mil florin (Nafl. 1.000,-) pa meter kuadra. Esaki ta duna un balor aserka di e terenonan so, sin konstrukshon na Mullet di entre 670 pa 780 mion florin. I ta netamente rònt dje balornan aki, Ansary su kálkulonan tabata sali. Penshonadonan di Ennia ta depende di e balor ku sali for di Mullet Bay.