Minister Ruisandro Cijntje

Willemstad- Na luna di desèmber 2022, Ministerio di Desaroyo Ekonómiko (MEO) huntu ku minister Ruisandro Cijntje a anunsiá e desishon pa temporalmente reintrodusí e areglo di Makutu Básiko 2012. Esaki a sosodé, komo parti di esfuersonan pa, konhuntamente ku partidonan den e kadena di supermerkado i minimarketnan, yega na un sistema ku tur persona den nos komunidat por tin akseso liber i hustu na komestibel i produktonan vital. Mirando ku  kòmbersashonnan ainda ta tumando lugá riba e efisiensia i efikasia di e Makutu Básiko i e posibilidatnan pa eventual alternativanan, MEO huntu ku partidonan enkuestion a yega na e desishon pa bolbe prolongá e areglo di Makutu Básiko 2012 ku un (1) aña. 

Despues di a reintrodusí e areglo di Makutu Básiko 2012 na luna di desèmber aña pasá, Minister Cijntje a instituí un ‘Task Force’ enkargá pa hasi un investigashon ku lo mester a konkluí si akaso e areglo di Makutu Básiko manera e ta aktualmente ta efektivo sufisiente òf si mester bini adaptashonnan den esaki òf kisas kompletamente un otro alternativa. A base di e konklushonnan di e ‘Task Force’, partidonan ya a sinta na mesa i práktikamente ta yegando na un palabrashon konkreto kon ta bai sigui. Esaki ta nifiká, ku si akaso logra konkretisá konklushonnan di  e ‘Task Force’ promé ku e periodo di un (1) aña pasa, MEO i Minister Cijntje lo anunsiá posibel kambionan di e areglo mas promé.

E Areglo Ministerial den kua a reíntrodusí Makutu Básiko 2012, ta inkluí entre otro produktonan manera aros, lechi, pan i algun fruta i berdura. E areglo den su totalidat ta disponibel riba wèpsait di Gobièrnu.cw pa un i tur ku ke tuma nota di dje.