EINDHOVEN—Den diferente siudat di Hulanda tabatin molester di awaseru fuerte i mal tempu, seguun KNMI.

Prinsipalmente den area di Eindhoven diferente kaya i tunel a keda bou di awa. Na De Klomp, serka di Veenendaal, un outo a keda pegá bou di un tunel na stashon Veenendaal. E outomobilista kier a pasa den tunel pa yega Ede, pero esaki a bai robes, segun Omroep Gelderland. Brantwer mester a saka e outomobilista for di e outo. Rondo di Amsterdam tambe tabatin problema ku mal tempu. Asina e tráfiko di trein a keda afektá na stashon Amsterdam komo resultado di rayo, ku menos trein por a kore. Riba karetera A10 na Amsterdam-Sloterdijk tabatin hopi awa riba kaminda, kasi inundashon, motibu dikon a sera dos karetera. Servisio meteorologiko a saka kodiko hel pa shete provinsia pero entretantu a revoká e atvertensia. E servisio ta konseha outomobilistanan pa tene kuenta ku e situashon.