WILLEMSTAD- Ayera, djaluna 22 di mei, e kompania di GBIZ a tene un seshon informativo di Repúblika Dominikana den studionan di KONTENTU pa asina promové biahenan entre Kòrsou i Repúblika Dominikana. Banda di informashon, e kompanianan ku a keda invitá a rifa diferente premio bou di e públiko ku tabata presente.

Manera ya e keda anunsiá anteriormente, GBIZ Solutions ta un kompania di Aviashon regional, Turismo i Desaroyo di negoshi. Nan ta traha ku e sektornan privá i públiko den Karibe i Latino Amérika.  Durante e evento,  oradónan invitá kual tabata Patricia Perez, pa Palladium Hotel Group, Felipe Gutierrez, pa AirCentury, Nacim Yala, pa Arajet i Vanessa Jansen di SKYhigh, a trese informashon tokante nan konekshon aéreo, ofertanan hotelero i tambe a rifa diferente premio atraktivo.

E kompanianan aero SKYhigh, Arajet i AirCentury ku ta brinda rutanan atraktivo entre Santo Domingo, Aruba, St Maarten, Miami, Venezuela, Cuba, St. Thomas, Martinique, Guadeloupe, Tortola, St. Kitts, Guyana Fransès, Boneiru, Kingston, Cartagena, Mexico, Guatemala, San Salvador, Punta Cana, Anguilla i Kòrsou, konhuntamente a rifa 3 pasashi pa Santo Domingo bou di e invitadonan. E kadena di hotèl spañó ‘Palladium Hotel Group’ a rifa un estadia na All-inclusive Grand Palladium Bávaro pa 2 persona. E kadena ta brinda famianan, amigunan i parehanan e oportunidat pa eksperensiá hotèlnan di 5 strea ‘All-inclusive’ i tin tres hotèl na Punta Cana: Grand Palladium Palace Resort Spa & Casino, Grand Palladium Punta Cana Resort & Spa i Grand Palladium Bávaro Suites Resort & Spa,

Banda di e kompanianan aéreo i hotelero menshoná ariba, e konsulado di Repúblika Dominikana i Mangusa Supermarket tabata presente. Di kual Mangusa a rifa 1 voucher pa hasi kompras na un di nan lokalidatnan na Kòrsou.

Despues di e seshon sumamente informativo ku a tuma lugá, e kompania di GBIZ Solutions, representá pa su direktor Elvis Reynoso, a informá ku pueblo di Kòrsou, Aruba i Boneiru kompletu por partisipá durante e simannan binidero pa gana diferente premionan mas ku lo keda rifá.  Pa mas informashon tokante partisipashon den e rifa aki por bishita página di Facebook di GBIZ.