Bultonan di droga ku a haña luna pasá na Shete Boka.

Willemstad, — Ya pa un par di dia Polis tin bista riba personanan ku ta bishita Shete Boka ku regularidat no pa atmirá e parti nort di Kòrsou pero si pa buska pakinan di droga ku a bin ta spula yega kosta.

Tur kos a kuminsá dia 14 di novèmber 2023 ora ku un grupo di turista a presentá na Boka Tabla pa ta mas eksakto e  Shete Boka nan na e parti nort di Kòrsou. E grupo di turista aki mester a kore yega den un Tour bus i a baha pa asina atmirá e bokanan na e parti nort i tambe algun gròt. Ora ku e grupo di turista aki a bai  baha na un di e bahianan na Shete Boka nan a bin topa ku un kantidat di pakinan i tambe bulto paresido na droga. Esaki a pone ku mesora a avisá e personal di seguridat ku na nan turno a pone Polisnan di Barber na altura di e hayasgo. Polis di Barber ku a bai na e sitio a bin tuma nota di e pakinan i tambe bultonan i a kuminsá sakanan for di laman pone na tera firme pa asina por a hasi mas investigashon. 

A pidi presensia di e tim di narkótika ku ta investigá kasonan di droga kual a yega huntu ku e tim di aresto pa por a konfiská e pakinan i tambe bulto bai warda kuné. Na warda a bin konstatá ku aki tabata trata di un lote di droga puru ku a spula yega tera. Su siguiente dia ku tabata 15 di novèmber 2023 e tim di reshèrshi a regresá e mesun sitio trempan den oranan di mainta unda a bin topa ku 22 paki mas ku tabata kontené kokaina kual tur a konfiská. Despues di a pisa i tambe tèst e droganan a destruí esakinan mesora.  Outoridatnan mesora a kuminsá ku un investigashon pa asina haña sa di unda e bultonan ku ta kontené droga  por ta bini kual a pone ku te asta  nan a spula yega na e kosta nort. 

Reshèrshinan ya tin algun dia hasiendo investigashon den tur sekresiá despues di a bin tuma nota ku  un hòmber supuestamente mester a  kai fo’i un baranka basta haltu den e laman brutu i no por a sali bek. Esaki mester a tuma lugá dia 15 di desèmber 2023 unda den oranan di mardugá a haña e informashon ku un supuesto piskadó mester a kai den laman. A kuminsá ku investigashon for di den oranan di mardugá pa den oranan di mainta por a reskatá e persona aki. For di e dia ei ya outoridatnan  tabatin informashon ku e persona aki mester a baha na laman pa buska kosnan ilegal pero no tabatin masha prueba. Miéntras ku tabata hasiendo mas investigashon despues ku a haña e informashon ku tin un grupo di persona ku ta buskando droga na e parti nort a bolbe drenta e informashon ku e biaha aki dos persona mester a kai for di baranka den laman brutu.

Esaki mester a sosodé  djarason den oranan di atardi i na momento ku a bai hasi investigashon a bin resultá ku ta e mesun persona ku 12 dia pasa a supuestamente a kai den laman pero a ser reskatá. Esaki a bolbe lanta mas pregunta serka outoridatnan unda a bin haña informashon ku na e sitio ei ta buskamentu di droga tin i nada di piskamentu. Outoridatnan a bin komprondé ku na e sitio ei ta un parti ku si resultá den laman no ta fásil pa sali bek esta no ta fásil pa subi kosta bek.  A bin komprondé ku ya den pasado a bula na awa ora a mira algu paresido na bulto tabata drif i supuestamente a haña un maleta ku tabata kontené kosnan ilegal entre nan arma di kandela. A logra di mara esaki na kabuya subi esaki laira i tabata bende armanan na preis di baka flaku.

Outoridatnan tin e informashon ku último esaki tabata e mesun intenshon esta di bula na awa pa buska droga pa despues ora ta kla pa yama polis pa e tim di reskate presentá. Tabatin e informashon ku mester a haña droga i a mara esaki na kabuya manda esaki laira pa otronan bai kuné  pa despues yama polis pa asina reskatá esnan ku tabata den laman. Esaki a pone ku outoridatnan ayera tabata riba pia i a hasi detenshon i tambe investigashon na dos kas.  Pa loke ta e baranka unda ta bula kada bes esaki tin un entrada ku mayoria kos ku resultá den laman ta bai pega den e buraku aki. esaki ta un di e motibunan ku ta baha den e laman brutu pa bai den e buraku aki pa buska últimamente e droga ku tabata spula yega kosta. Outoridatnan tin e informashon ku den e último dianan aki a logra di haña mas pakete ku droga. E kaso ta den investigashon.