Mainta trempan a presentá na Shete Boka pa buska mas paki di droga den laman.

Willemstad— Ayera den oranan di mainta trempan e tim di narkótika a regresá Shete Boka unda un dia anterior a haña mas di 213  kilo di koka ta drif na e parti nort di Kòrsou.

Despues ku un dia anterior a konfiská pakinan di droga ku tabata drif den laman i tambe dos bulto ku tabata kontené kantidat di pakinan di kokaina na altura di Shete Boka na Banda Bou, ayera den oranan di mainta e tim di narkótika a bolbe regresá na e mesun sitio. E tim di narkótika huntu ku personal di Warda Kosta a presentá mainta trempan i a bai kontrolá na e kosta nort unda un dia anterior a haña droga ta drif.

No mester a buska masha ya ku a bin topa atrobe ku mas di e pakinan di droga ta drif den laman. Tabata trata di un kantidat di 22 paki ku tabata kontené droga kual mesora a keda konfiská.  A sigui despues ku kontròl na e otro boka nan na e parti nort di Kòrsou i no a haña nada partikular. Mas den oranan di atardi Polisnan di Barber si a bin topa ku un paki ku tabata kontené droga kual a keda konfiská i hiba pa e departamentu di droga kual lo kontinuá ku e investigashon.