WILLEMSTAD; Pa kontinuá e promoshon di lesamentu i enfatisá su importansia pa e mucha su mente i kreatividat, Banco di Caribe ta presentá ‘Ban Lesa i Krea’.
Despues di a presensiá e entusiasmo di e muchanan durante ‘Siman di Ban Lesa’, Banco di Caribe a keda inspirá pa duna e muchanan e oportunidat pa sigui eksplorá nan imaginashon. ‘Ban Lesa i Krea’ ta un kompetensia ku ta un kontinuashon di e proyekto aki. Banco di Caribe ta invitá tur mucha di 6 te i ku 12 aña pa skohe nan kuenta òf buki preferí i uza nan kreatividat pa ilustrá esaki den un pintura òf un obra di arte. E por ta un arte inspirá pa loke nan a siña den e ‘ Siman di Ban Lesa’ riba e tema ‘Na mi Kas’.
‘Ban Lesa i Krea’ ta kuminsá 14 di novèmber 2023, pues e muchanan por kuminsá traha riba nan obra di arte mesora pa entregá esaki na un di e filialnan di Banco di Caribe mas tardá 1 di desèmber 2023. Asin’ei nos hurado por atmirá i evaluá tur e obranan pa skohe esnan ku a resaltá. Lo anunsiá e ganadornan dia 8 di desèmber 2023. Premionan ta inkluí un tablet Amazon Fire HD 10 i kuenta di banko di Tesorito ku un montante di Fl.100,- òf Fl.200,- Mayornan por bishitá www.bancodicaribe.com pa lesa mas tokante ‘Ban Lesa i Krea’ i reglanan ku mester tene kuenta kuné pa garantisá un partisipashon eksitoso.
Banco di Caribe ta sumamente ansioso pa mira e kreashonnan di nos muchanan i ta positivo ku e kompetensia ‘Ban Lesa i Krea’ lo yuda ku desaroyo edukativo di nos hubentut.