Programa Ban Tende Tiru den Union 2023

WILLEMSTAD – Ban Tende Tiru den Union ya a bira e tradishon di tur fin di aña i Minister Sithree van Heydoorn ta invitá Pueblo di Kòrsou pa nos ban sera aña huntu riba Plasa Brion, partisipando masalmente na e gran evento aki. Ministerio di Enseñansa, Siensia Kultura i Deporte (ESKD) a prepará un programashon mashá spesial pa pueblo por gosa un bes mas di nos tradishonal Ban Tende Tiru den Union. E programa ta kuminsá for di 19:00 di anochi riba dia 31 di desèmber 2023 i ta tèrminá pa 01:30 di mardugá riba 1 yanüari 2024.

Lo tin presentashon di Los Cariñitos, Los Paranderos, Sablika, Jurgen and Friends, Explosion Dancers, Grupo Kòmpèr, Trio Ekis, Zoyoyo i su Grupo, Típiko pasa bon huntu ku grupo di baile Futuro Memoria di Kòrsou  i hopi mas. E anochi ta klousurá ku agrupashon Doble Puru.

Kòrda ku no tin stul pa públiko riba Plasa Brion pues esun ku ke sinta mester trese su stul. E aña akí ministerio di ESKD ta introdusí un inovashon. Durante di e aktividat lo tin algun “stand” ku benta di kos di bebe i kome.

Minister Sithree van Heydoorn ta invitá pueblo di Kòrsou pa huntu nos ban mustra gratitut pa tur loke nos a risibí den 2023 i pa den union nos yama 2024 bon biní.