WILLEMSTAD: Algun siman pasá Banco di Caribe a duna inisio na e kompetensia ‘Ban Lesa i Krea’ pa promové lesamentu i enfatisá su importansia pa e mucha su mente i kreatividat. E kompetensia a forma parti di e trayekto di Siman di Ban Lesa.

Despues di a risibí i atmirá diferente obranan di arte i pinturanan bunita di nos muchanan, e kompetensia a yega su final. E partisipantenan a demostrá ku nan tin un imaginashon briante i ku nan por ekspresá esaki mediante  diferente material i dibuho. Huradonan di ‘Ban Lesa i Krea’, Tito Ansano (Lider di Proyekto ‘Siman di Ban Lesa 2023’), Jenni Coffi Alberto (Eskritor), Dewi Maja (Maestro di Arte, Studio Tropicana) i Bagira Tizraoui (Konosido Pintor i propietario di The Gallery by Bagira), a evaluá kada kreashon pa yega na e desishon final.   

E tres ganadornan entusiasmá, a bishitá Banco di Caribe Saliña, djabièrnè último pa tende resultado i risibí nan premionan. Ethan Godfried a sali na promé lugá i a gana un un tablet Amazon Fire HD 10, siguí pa Nataniel Francisca na di dos lugá ku a risibí un un kuenta di banko di Tesorito ku un montante di Fl.200,- i Queen-Alisja Poewasak na terser lugá ku tambe a risibí un un kuenta di banko di Tesorito ku un montante di Fl.100,-. Masha Pabien!

Un danki ta bai na tur mucha, nan mayornan, maestronan i eskritornan ku a aportá na ‘Ban Lesa i Krea’. Banco di Caribe ta apresiá e huradonan tambe ku a tuma tempu pa duna e atenshon meresí na kada kreashon. E meta prinsipal di ‘Ban Lesa i Krea’ tabata pa enkurashá lesamentu di un manera kreativo. Despues di a mira e kreashonnan, por konkluí ku a logra inspirá e hóbennan pa sigui ekspresá nan mes i  desaroyá nan talentonan artístiko.